ჯანდაცვის მინისტრის, ზურაბ აზარაშვილის განცხადებით, იშვიათი დაავადებების საბჭომ აქონდროპლაზიის დიაგნოზის მქონე ბავშვებისთვის, პრეპარატის voxzogo შესყიდვაზე სამინისტროს დადებითი რეკომენდაცია არ მისცა.

მისივე თქმით, საბჭო თვლის, რომ მედიკამენტი არის ექსპერიმენტული, ის დაკავშირებულია სხვადასხვა გვერდით მოვლენებთან და არცერთ სხვა ქვეყანას სახელმწიფო დაფინანსებით აღნიშნული მედიკამენტის შეძენა დაწყებული არ აქვს.

„არაერთი შეხვედრა შედგა დაინტერესებულ მშობლებთან. ჩვენს სამინისტროში შექმნილია იშვიათი დაავადებების საბჭო, ეს არის უწყებათაშორისი საბჭო, სადაც ჩართულები არიან სხვადასხვა უწყების წარმომადგენლები, ასევე ბავშვთა ექიმები, ბიოეთიკის საბჭოს წარმომადგენლები, სახალხო დამცველი და ბევრი სხვადასხვა სტრუქტურის წარმომადგენელი. საბჭოს რამდენიმე განხილვა ჰქონდა, სიმართლე რომ გითხრათ ამ საბჭოს ბოლო განხილვას მე არ დავსწრებივარ, საბჭოზე დეტალურად სხვადასხვა ქვეყნების მაგალითები განხილული იქნა, სადაც აღნიშნული მედიკამენტის შესწავლა მოხდა. აქტიური კომუნიკაცია გვქონდა, როგორც ჯანმრთელობის მსოფლიო ორგანიზაციასთან და პაციენტების უფლებების დაცვის ევროპულ საზოგადოებებთან, ასევე სხვადასხვა ქვეყნებთან, სადაც ეს განხილვები მიმდინარეობდა.

ამ ეტაპზე შემიძლია დაგიდასტუროთ, რომ საბჭოს ამ მედიკამენტის შესყიდვასთან დაკავშირებით სამინისტროსთვის დადებითი რეკომენდაცია არ მოუცია. გამომდინარე იქიდან, რომ მედიკამენტი მათი შეფასებით არის ექსპერიმენტული, ის არის დაკავშირებული სხვადასხვა გვერდით მოვლენებთან და არცერთ სხვა ქვეყანას სახელმწიფო დაფინანსებით აღნიშნული მედიკამენტის შეძენა დაწყებული არ აქვს. კიდევ უფრო მეტიც, გერმანიას, დიდ ბრიტანეთს და კიდევ ბევრ ქვეყნებს შესწავლის პროცესში განხილვა შეჩერებული აქვთ, იმიტომ, რომ ამ მედიკამენტზე ჩაითვალა, რომ ამ მედიკამენტის დაფინანსებაზე მსჯელობა მიზანშეწონილი არ არის. შესაბამისად, როცა მსოფლიოში ამ მედიკამენტთან დაკავშირებულ მოვლენებს აფასებს საბჭო, აქედან გამომდინარეა, რომ დადებითი გადაწყვეტილება არ არის მიღებული. საუბარია ახლად შექმნილ მედიკამენტზე, რომელიც დაჩქარებული ავტორიზაციით მიღებული აქვს FDA-ის და EMA-ს. მხოლოდ განსაკუთრებულ შემთხვევებში გამოიყენება, ზოგიერთ შემთხვევებში. საუბარია დაახლოებით 900 000 ლარის წლიურ დოზაზე ერთი ბავშვისთვის, რომელიც სრულწლოვანებამდე უნდა გამოიყენონ. ამ მედიკამენტის გამოყენებით მაქსიმალური ეფექტი, რაც შეიძლება მიღწეული იყოს, რაც კვლევებით არის დაფიქსირებული, არის წლის განმავლობაში 1.6 სანტიმეტრით ზრდა“, - განაცხადა აზარაშვილმა.

ცნობისთვის, რამდენიმე თვეა აქონდროპლაზიის დიაგნოზის მქონე ბავშვების მშობლები ჯანდაცვის სამინისტროსთან და მთავრობის ადმინისტრაციასთან აქციებს მართავენ. ისინი უწყებებს მათი შვილებისთვის საჭირო პრეპარატის voxzogo-ს დაფინანსებას სთხოვენ.