ატომური ენერგიის საერთაშორისო სააგენტოს (IAEA) გენერალური დირექტორი, რაფაელ გროსი 5 აპრილს რუსეთს ეწვევა.

აღნიშნული ვიზიტის შესახებ IAEA-ში რუსეთის მუდმივმა წარმომადგენელმა, მიხაილ ულიანოვმა მედიას განუცხადა.

მისი თქმით, გროსი რუსულ დელეგაციას ზაპოროჟიეს ატომურ ელექტროსადგურში არსებული ვითარების განსახილველად შეხვდება.

როგორც მედია წერს, IAEA-ის გენერალური დირექტორი ბირთვულ ობიექტზე დემილიტარიზებული ზონის შექმნას ითხოვს.

ცნობისთვის, გროსი გასულ ოთხშაბათს ზაპოროჟიეს ეწვია.

შეგახსენებთ, ზაპოროჟიეს ბირთვული ობიექტი ევროპის უდიდესი ატომური ელექტროსადგურია, რომლის ოკუპირებაც რუსულმა ძალებმა გასული წლის მარტიდან მოახდინეს.