აშშ-ის მთავრობა ცდილობს რუსეთში ჯაშუშობის ბრალდებით დაკავებული Wall Street Journal-ის ჟურნალისტის, ევან გერშკოვიჩის გათავისუფლებას. ამის შესახებ თეთრი სახლის ეროვნული უსაფრთხოების საბჭოს სტრატეგიული კომუნიკაციების კოორდინატორმა ჯონ კირბიმ განაცხადა.

“შეერთებული შტატები მკაცრად და ყურადღებით ადევნებს თვალყურს მის დაკავებას”, - აღნიშნა კირბიმ.

შეგახსენებთ, რამდენიმე დღის წინ რუსეთის უსაფრთხოების ფედერალურმა სამსახურმა ეკატერინბურგში, ამერიკული გამოცემა Wall Street Journal-ის მოსკოვის ბიუროს კორესპონდენტი, ევან გერშკოვიჩი დააკავა. “ეფესბეს” თქმით, დაკავებული ჟურნალისტი შეერთებული შტატების სასარგებლოდ ჯაშუშობაშია ეჭვმიტანილი.

რუსეთის უსაფრთხოების ფედერალურ სამსახურის მტკიცებით, გერშკოვიჩმა, შეერთებული შტატების დავალებით, შეაგროვა ინფორმაცია რუსეთის სამხედრო-სამრეწველო კომპლექსის ერთ-ერთი საწარმოს საქმიანობის შესახებ, რაც სახელმწიფო საიდუმლოებას წარმოადგენს.