საქართველოს მესამე პრეზიდენტის დედის, გიული ალასანიას განცხადებით, მას შემდეგ, რაც სახალხო დამცველის ექიმების კონსილიუმს დასკვნა ექნება, მიხეილ სააკაშვილის ადვოკატები სტრასბურგში გასაგზავნ ტექსტზე ისაუბრებენ.

როგორც გიული ალასანიამ კლინიკა „ვივამედში“,მიხეილ სააკაშვილის მონახულებამდე აღნიშნა, აუცილებელია, სტრასბურგის სასამართლომ მესამე პრეზიდენტის მდგომარეობის სრული სურათი დაინახოს.

„საშინელი სანახავია. ძალიან გამხდარია, ჩვეულებრივი ჩონჩხივით. მე მაქვს იმედი და ველოდები, რომ კონსილიუმს დასკვნა ექნება. ამის შემდეგ, ადვოკატები, ალბათ, მოვლენ და ისაუბრებენ იმ ტექსტზე, რომელიც სტრასბურგში გაიგზავნება. მეც მიმაჩნია, რომ ეს აუცილებელია. ჩვენ სტრასბურგს მიშას ჯანმრთელობის მდგომარეობის სრული სურათი უნდა ვაჩვენოთ“, - აღნიშნა გიული ალასანიამ.