საგზაო უსაფრთხოების უწყებათაშორისი კომისიის მეორე სხდომაზე, რომელიც ეკონომიკისა და მდგრადი განვითარების მინისტრის მოადგილე გურამ გურამიშვილის თავმჯდომარეობით ჩატარდა, საქართველოს საგზაო უსაფრთხოების ეროვნული სტრატეგიის სამოქმედო გეგმის 2022 წლის წლიური ანგარიშის პრეზენტაცია მოისმინეს.

ეკონომიკისა და მდგრადი განვითარების სამინისტროს ინფორმაციით, პრეზენტაცია მოიცავდა დეტალურ ინფორმაციას 2022-2025 წლების საგზაო უსაფრთხოების ეროვნული სტრატეგიის 2022-2023 წლების სამოქმედო გეგმით გათვალისწინებული ამოცანებისა და ღონისძიების განხორციელების მიმდინარეობას საგზაო უსაფრთხოებაზე პასუხისმგებელი სახელმწიფო უწყებების მიხედვით.

„კომისიის სხდომაზე აგრეთვე განიხილეს გაეროს ევროპის ეკონომიკური კომისიის მხარდაჭერით განხორციელებული კვლევის შედეგები საგზაო უსაფრთხოების ღონისძიებებთან დაკავშირებით და ევროკავშირის TWINNING-ის პროექტის მიმდინარეობა, ასევე ქვეყანაში საგზაო უსაფრთხოების კუთხით დღეისათვის არსებული მნიშვნელოვანი გამოწვევები.

კომისიის სხდომას დაესწრნენ საგზაო უსაფრთხოებაზე პასუხისმგებელი სახელმწიფო უწყებების (საქართველოს ეკონომიკისა და მდგრადი განვითარების სამინისტრო, საქართველოს შინაგან საქმეთა სამინისტრო, საქართველოს რეგიონული განვითარებისა და ინფრასტრუქტურის სამინისტრო, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო, საქართველოს განათლებისა და მეცნიერების სამინისტრო, ქალაქ თბილისის მუნიციპალიტეტის მერია) ხელმძღვანელი და პასუხისმგებელი პირები.

საგზაო უსაფრთხოების უწყებათაშორისი კომისია ჩამოყალიბდა 2023 წლის 4 აპრილს საქართველოს მთავრობის №353 დადგენილებით დამტკიცებული საქართველოს 2022-2025 წლების საგზაო უსაფრთხოების ეროვნული სტრატეგიის შესაბამისად“,- ნათქვამია ინფორმაციაში.