რუსული აგრესია ადასტურებს, რომ ქვეყნისთვის საიმედო მხოლოდ კოლექტიური პრევენციული უსაფრთხოების გარანტიები შეიძლება იყოს, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

„მოხდა ისტორიული მოვლენა ჩვენი რეგიონისთვის, მთელი ევროპისთვის, მთელი ევროატლანტიკური საზოგადოებისთვის - ფინეთი ნატოს 31-ე წევრი გახდა. ალიანსი ძლიერდება აღმოსავლეთ ფლანგზე", - განაცხადა ზელენსკიმ.

მან ფინელ ხალხს და ქვეყნის პრეზიდენტს კოლექტიური "უსაფრთხოების საიმედო გარანტიის" მიღება მიულოცა.

"რუსული აგრესია ცალსახად ადასტურებს, რომ მხოლოდ კოლექტიური გარანტიები, მხოლოდ პრევენციული გარანტიები შეიძლება იყოს საიმედო. ეს არის ის, რაზეც ჩვენ ყოველთვის ვსაუბრობდით. ჩვენ ასევე ვისაუბრეთ სიჩქარეზე - უსაფრთხოებასთან დაკავშირებით გადაწყვეტილებების მიღების სისწრაფე მნიშვნელოვანია. ახლა ჩვენ ვხედავთ, რამდენად სწრაფი შეიძლება იყოს პროცედურები", - განაცხადა ზელენსკიმ.

მან ასევე ხაზი გაუსვა, რომ ვილნიუსში ნატო-ს წლევანდელი სამიტი საკმაოდ ამბიციური უნდა იყოს.

"რაც უფრო ამბიციურია ის, ვინც იცავს თავისუფლებას, აგრესიის მით ნაკლები შესაძლებლობა აქვს ბოროტების მსურველს. დადგება დღე, როდესაც უსაფრთხოება გარანტირებული იქნება ჩვენი ქვეყნისთვისაც", - აღნიშნა ზელენსკიმ.