შავი ზღვის წყალქვეშა კაბელის პროექტის სავარაუდო მარშრუტისა და ლოკაციის შერჩევის მიზნით, ეკონომიკისა და მდგრადი განვითარების, გარემოს დაცვის და სოფლის მეურნეობის სამინისტროების, სს „საქართველოს სახელმწიფო ელექტროსისტემის“, სსიპ „დაცული ტერიტორიების სააგენტოს“ და ადგილობრივი ხელისუფლების წარმომადგენლები იტალიური საკონსულტაციო კომპანია CESI-ს ექსპერტებთან ერთად ანაკლიაში იმყოფებოდნენ.

ინფორმაციას ამის შესახებ „საქართველოს სახელმწიფო ელექტროსისტემა“ ავრცელებს.

მათივე ცნობით, სტუმრებმა ანაკლიის სანაპირო ზოლში ელექტროგადამცემი ინფრასტრუქტურის განთავსების ლოკაციები მოინახულეს და განიხილეს. გარემოს დაცვის და სოციალური ზემოქმედების სკრინინგის ანგარიშის დასასრულებლად, ადგილზე მოკვლევა და დათვალიერება განხორციელდა.

მათივე ინფორმაციით, წარმომადგენლობა ასევე ქვესადგურში „ჯვარი 500“ იმყოფებოდა, სადაც შავი ზღვის წყალქვეშა კაბელის საქართველოს ენერგოსისტემასთან მიერთებაა დაგეგმილი.

„საქართველოს სახელმწიფო ელექტროსისტემის“ დირექტორთა საბჭოს წევრის, ზვიად გაჩეჩილაძის განცხადებით, კომისიამ ანაკლიაში ის ლოკაციები დაათვალიერა, სადაც სამომავლოდ ელექტროგადამცემი ინფრასტრუქტურის ზღვაში ჩასვლა იგეგმება, ხოლო მოძიებული ინფორმაციის საფუძველზე, ისეთი მნიშვნელოვანი საკითხები დაზუსტდება, როგორებიცაა: კაბელის მარშრუტი, გარემოს დაცვისა და სოციალური სკრინინგის საკითხები და ა.შ.

„ჩვენ ვიკვლევთ საქართველოსა და რუმინეთს შორის ელექტროენერგიის გადაცემის შესაძლებლობას შავი ზღვის ფსკერზე გამავალი 1100 კმ სიგრძის კაბელის მეშვეობით. უკვე შევარჩიეთ მარშრუტი და გარდამავალი სადგურების ადგილმდებარეობა. ვიზიტის მიზანია, განვსაზღვროთ, რა შედეგები გვაქვს კვლევის ამ ეტაპისთვის, გადავამოწმოთ ჩვენ მიერ უკვე შესრულებული სამუშაოები, რათა გარემოს დაცვის და მოსახლეობისთვის დისკომფორტის შექმნის თვალსაზრისით, ინფრასტრუქტურის მშენებლობით გამოწვეული ზემოქმედება მინიმალური იყოს“, - განაცხადა კომპანია CESI-ის წარმომადგენელმა და პროექტის მენეჯერმა, სტეფანო მალგაროტიმ.

გავრცელებულ ინფორმაციაში ასევე აღნიშნულია, რომ „შავი ზღვის წყალქვეშა კაბელის პროექტის” პრაქტიკული განხორციელების შესაძლებლობებისა და საუკეთესო გზების დადგენის მიზნით, აქტიურ რეჟიმში მიმდინარეობს პროექტის ტექნიკურ-ეკონომიკური კვლევა, რომელსაც „საქართველოს სახელმწიფო ელექტროსისტემის“ დაკვეთით, კომპანია CESI-ი ახორციელებს. ტექნიკურ-ეკონომიკური კვლევა 2023 წლის ბოლოს დასრულდება.