დაცვის მხარე გამოიყენებს ყველა მექანიზმს, მათ შორის საერთაშორისო მექანიზმებს იმისთვის, რომ ჩვენი დაცვის ქვეშ მყოფის უფლებები მაქსიმალურად დაცული იყოს, - ამის შესახებ ყოფილი პრეზიდენტის, მიხეილ სააკაშვილის ადვოკატმა, შოთა თუთბერიძემ ჟურნალისტებს განუცხადა.

როგორც მან აღნიშნა, საკითხი არ დგას იმდაგვარად, თუ რას ელოდება დაცვის მხარეს სტრასბურგში სარჩელის შეტანისთვის.

„ხაზი მინდა გავუსვა იმას, რომ საქართველოს ხელისუფლების მცდელობები, რომ ევროსასამართლო საფრთხობელად წარმოაჩინოს, ყოველთვის უშედეგო იქნება იმიტომ, რომ დაცვის მხარე ამ სატყუარაზე წარმოგებას არ აპირებს. დაცვის მხარე გამოიყენებს ყველა მექანიზმს, მათ შორის საერთაშორისო მექანიზმებს იმისთვის, რომ ჩვენი დაცვის ქვეშ მყოფის უფლებები მაქსიმალურად დაცული იყოს.

[სარჩელს შევიტანთ] მაშინ, როცა თავად პრეზიდენტი და დაცვის მხარის სამართლებრივი მრჩევლები მიზანშეწონილად ჩათვლიან, რომ ეს მოხდეს. პირველ რიგში, ძალიან კარგად მესმის ქალბატონი გიულის და ყველა იმ ადამიანის, ვისაც მიხეილ სააკაშვილის პოლიტიკური ტყვეობიდან დახსნა ეჩქარება და ამისთვის მას გულშემატკივრობს, ჩემთვის ეს წმინდა ადამიანური ფაქტორია. მეც ძალიან მინდა, რომ მის მიმართ სამართლიანობა აღსრულდეს, მინდა ყველა პოლიტიკურ პატიმარი თავისუფალი ვიხილო, თუმცა ერთმანეთისგან უნდა გავმიჯნოთ სამართლებრივი სტრატეგია და ჩვენი ადამიანური სურვილები“, - განაცხადა შოთა თუთბერიძემ.