გავაგრძელებთ საქართველოს, მოლდოვისა და ბოსნია და ჰერცეგოვინის მხარდაჭერას, რომლებიც რუსეთისგან ზეწოლას განიცდიან. ამის შესახებ ნატოს გენერალურმა მდივანმა იენს სტოლტენბერგმა ალიანსის წევრი სახელმწიფოების საგარეო საქმეთა მინისტრებთან შეხვედრის შემდეგ განაცხადა.

მისი თქმით, აღნიშნული შეხვედრა მნიშვნელოვანი იყო ვილნიუსის სამიტისთვის მოსამზადებლად, რომელიც ივლისში არის დაგეგმილი.

“გუშინ ნატო-უკრაინის კომისიაში საგარეო საქმეთა მინისტრ კულებას შევხვდი. ვთანხმდებით, რომ აუცილებელია უკრაინისთვის სამხედრო დახმარების გაგრძელება…

არ ვიცით ეს ომი როდის დასრულდება, მაგრამ, როდესაც ეს მოხდება, უნდა უზრუნველვყოთ, რომ პრეზიდენტი პუტინი ვერ შეძლებს ევროპის უსაფრთხოების დასუსტების გაგრძელებას”, - განაცხადა სტოლტენბერგმა.

ნატოს გენერალურმა მდივანმა აღნიშნა, რომ წევრი სახელმწიფოები შეთანხმდნენ უკრაინის სტრატეგიული მრავალწლიანი დახმარების პროგრამის შემუშავებაზე, რომელიც უკრაინის ალიანსთან თავსებადობას გაზრდის და ნატოს სტანდარტებთან დააახლოებს.