აბსოლუტურად მოუმზადებელი პრეზენტაცია იყო. მგონი, კონცეფცია ამ კვირაში დაწერეს, - ამის შესახებ ჯანდაცვის ექსპერტმა, ვატო სურგულაძემ რესპუბლიკურ საავადმყოფოსთან დაკავშირებით სამომავლო გეგმებისა და კონცეფციის პრეზენტაციის შემდეგ განაცხადა.

მისივე თქმით, ბიუჯეტში ექიმებისთვის გასაცემი ანაზღაურების შესახებ არაფერი წერია. ამასთან, აღნიშნავს, რომ უცნობია, კლინიკის დემონტაჟის შემთხვევაში რამდენი წლის განმავლობაში მიიღებენ ექიმები ანაზღაურებას.

„აბსოლუტურად მოუმზადებელი პრეზენტაცია იყო. მგონი, კონცეფცია ამ კვირაში დაწერეს. ყველაფერი მოუმზადებელია - რა რისკებია, სად აშენდება, როგორ აშენდება, რა დასკვნებია?! რაც შეეხება ანაზღაურებას, ბიუჯეტში არ დევს ანაზღაურება, რაც უნდა გასცენ.

უცნობია, არავინ იცის ეს ანაზღაურება 3 წელზე იქნება გაწერილი, თუ 4 წელზე?! ეს ყველაფერი წინასწარ უნდა იყოს გაწერილი. სად აპირებენ ამდენი ადამიანის დასაქმებას? იცით, რაც მოხდა ონკოლოგიურ ცენტრში, დაჰპირდნენ და დღემდე დანგრეულია. კერძო სტრუქტურაში აპირებენ ამ ექიმების დასაქმებას?! სჭირდებათ კი მათ ამდენი ექიმი?!

რესპუბლიკურის კოლექტივის დაშლა შეცდომა იქნება“, - აღნიშნავს სურგულაძე.