კავკასიის საერთაშორისო უნივერსიტეტის ბიზნესისა და ტექნოლოგიების ფაკულტეტის დეკანის თანამდებობაზე მარიკა კლდიაშვილი წარადგინეს
აკადემიური და ადმინისტრაციული პერსონალისთვის, კავკასიის საერთაშორისო უნივერსიტეტის ბიზნესისა და ტექნოლოგიების ფაკულტეტის დეკანის თანამდებობაზე მარიკა კლდიაშვილის წარდგენა გაიმართა. ამის შესახებ ინფორმაციას კავკასიის საერთაშორისო უნივერსიტეტი ავრცელებს.
მათი ინფორმაციით, ღონისძიებაზე მისასალმებელი სიტყვით წარდგნენ კავკასიის საერთაშორისო უნივერსიტეტის რექტორი, პროფესორი - კახაბერ კორძაია; CIU-ს ბიზნესისა და ტექნოლოგიების ფაკულტეტის ყოფილი დეკანი, პროფესორი - გიორგი აბაშიშვილი და ხარისხის უზრუნველყოფის სამსახურის უფროსი - მარინა გედევანიშვილი.
„შეხვედრაზე ბიზნესისა და ტექნოლოგიების ფაკულტეტის დეკანმა, დამსწრე საზოგადოებას წარუდგინა სამოქმედო გეგმა, ფაკულტეტზე დაგეგმილი პროექტებისა და სიახლეების შესახებ და ყურადღება გაამახვილა ფაკულტეტის საქმიანობის ძირითად მიმართულებებზე, როგორებიცაა: პრაქტიკული კომპონენტის ინტეგრირება სასწავლო პროცესში; სტუდენტთა კარიერული განვითარების ხელშეწყობა; მეწარმეობის და ინოვაციების განვითარების ხელშეწყობა; ბიზნესისა და ტექნოლოგიების ფაკულტეტის კვლევითი საქმიანობა და მეცნიერების მხარდაჭერა; ბიზნესისა და ტექნოლოგიების ფაკულტეტის საერთაშორისო თანამშრომლობა; აბიტურიენტებთან მჭიდრო ურთიერთობა; სოციალური პასუხისმგებლობა.
ასევე, შეხვედრის ფარგლებში, გაიმართა ფაკულტეტზე პრაქტიკული კომპონენტის განხორციელების მიზნით დაგეგმილი პროექტების პრეზენტირება: ელექტრონული კომერციის ლაბორატორია; ხელოვნური ინტელექტის ლაბორატორია; ბიზნეს კლინიკა; იმიტირებული ბირჟა; VR ტექნოლოგიების ლაბორატორია; წარმოების ხარისხის მენეჯმენტის ლაბორატორია(GMP, ISO, HACCP.
შეხვედრის ბოლოს, CIU-ს აკადემიურ და ადმინისტრაციულ პერსონალსა და მოწვეულ სტუმრებს, შემაჯამებელი სიტყვით კავკასიის საერთაშორისო უნივერსიტეტის კანცლერმა ვახტანგ წივწივაძემ მიმართა.
შეგახსენებთ, რომ მარიკა კლდიაშვილი არის CIU-ს ბიზნესისა და ტექნოლოგიების ფაკულტეტის ასოცირებული პროფესორი, სერტიფიცირებული საერთაშორისო ბიზნეს ანალიტიკოსი IQBBA CFLBA, სერტიფიცირებული პროექტის მართვის პროფესიონალი PMP (PMI.org), სერტიფიცირებული საერთაშორისო ქოუჩი (Erickson Coaching International) და პროცესების მართვის ექსპერტი Lean Six Sigma, აიტი სერვისების მართვის პროფესიონალი (ITIL)”, - ნათქვამია ინფორმაციაში.
