რუსეთის სასამართლომ ორ მამაკაცს 19-19 წლით თავისუფლების აღკვეთა მიუსაჯა ომის წინააღმდეგ გამართული საპროტესტო აქციის დროს სამთავრობო შენობისთვის ცეცხლის წაკიდების გამო.

მედიის ცნობით, რომან ნასრიევმა და ალექსეი ნურიევმა 2022 წლის 11 ოქტომბერს, უკრაინაში მიმდინარე ომისა და რუსეთის მიერ გამოცხადებული ნაწილობრივი მობილიზაციისადმი პროტესტის ნიშნად, "მოლოტოვის კოქტეილი" ესროლეს ჩელიაბინსკის ოლქის ქალაქ ბაკალის ადმინისტრაციულ შენობას, სადაც სამხედრო კომისარიატია განთავსებული.

როგორც მედია წერს, დაცვის თანამშრომელმა ხანძრის სწრაფად ჩაქრობა მოახერხა.

რუსეთის ფედერალური უსაფრთხოების სამსახურის (ეფ-ეს-ბე) თანამშრომლებმა კი ნასრიევი და ნურიევი შენობისთვის ცეცხლის წაკიდებიდან მალევე დააკავეს.