ორგანიზაციამ „დემოკრატიის მრავალფეროვნება“ (V-DEM) უზენაესი სასამართლოს დამოუკიდებლობის ინდექსი გამოაქვეყნა, სადაც საქართველოს უზენაესი სასამართლოს დამოუკიდებლობის შეფასება ზედიზედ მეცხრე წელს, კერძოდ, 2013-2022 წლებში, დადებითი ქულით აღინიშნა.

საქართველო 0,45 ქულით ბოლო 6 (2017-2022) წლის მაქსიმუმზეა. საქართველო უზენაესი სასამართლოს დამოუკიდებლობით უსწრებს ყველა მეზობელ სახელმწიფოს, ევროკავშირის და ნატო-ს რამდენიმე წევრს. ეს ქვეყნებია: პოლონეთი, უნგრეთი, ჩრდილოეთ მაკედონია, სინგაპური, უკრაინა, თურქეთი, აზერბაიჯანი, სომხეთი და ა.შ.

V-dem ინსტიტუტს 2013 წლიდან მოყოლებული საქართველოს უზენაესი სასამართლოს დამოუკიდებლობა დადებითი ნიშნით აქვს შეფასებული. 2004-2012 წლებში საქართველოს უზენაესი სასამართლოს შეფასება 0-ზე დაბალი ქულით, ანუ უარყოფითი ნიშნით იყო შეფასებული ზედიზედ 9 წლის განმავლობაში.

იქამდე, კერძოდ 1998-2003 წლებში საქართველოს უზენაესი სასამართლოს დამოუკიდებლობის შეფასების ქულა დადებითი ნიშნით იყო, თუმცა მნიშვნელოვნად ჩამოუვარდება 2022 წლის მაჩვენებელს.

უზენაესი სასამართლოს დამოუკიდებლობის ინდექსის მიხედვით ლიდერი სახელმწიფოებია ლატვია, ავსტრალია, ახალი ზელანდია, ბოლო ადგილებზე კი დასახელდა რუსეთი, მიანმარი, აზერბაიჯანი, ჩრდილოეთ კორეა, ნიკარაგუა და ბელარუსი.

„დემოკრატიის მრავალფეროვნება“ (V-Dem) არის მსოფლიოში ერთ-ერთი უდიდესი სოციალური პროექტი, სამეცნიერო მონაცემების შეგროვების და ანალიზის პროექტი უშუალოდ დემოკრატიაზე.

„დემოკრატიის მრავალფეროვნების“ (V-DEM) უზენაესი სასამართლოს დამოუკიდებლობის ინდექსი