“სტრატეგია აღმაშენებლის” პოლიტიკური საბჭოს წევრის, განათლების მიმართულების ხელმძღვანელის ნანა ტოხვაძის განცხადებით, განათლების მინისტრმა, გიორგი ამილახვარმა შეხვედრასთან დაკავშირებით 500 მასწავლებლის მიმართვა უგულებელყო.

მისი შეფასებით, გიორგი ამილახვარი მასწავლებლებს „კატა-თაგვობანას“ ეთამაშება.

„განათლების ახალი მინისტრი, გიორგი ამილახვარი, რომელიც პირობას დებდა, რომ ყველა ღირსეულ მასწავლებელს შეხვდებოდა, პირობას არღვევს და 500 მასწავლებლის მიმართვას შეხვედრაზე უგულებელყოფს. ამილახვარი „კატა-თაგვობანას“ ეთამაშება მასწავლებლებს, რომლებმაც სახელმწიფოს მიერ შეთავაზებული მენტორ-წამყვანის გამოცდა პირნათლად ჩააბარეს და სრულიად გაუგებარ ვითარებაში აღმოჩნდნენ. გამოცდის გარდა, მათ სტატუსის ასამაღლებლად სავალდებულო პორტფოლიოს წარდგენა ევალებათ. კრიტერიუმები კი გამოცდიდან 8 თვის თავზე, ანუ 10 აპრილს "აღირსეს", ხოლო ატვირთვის ვადა მხოლოდ თვის ბოლომდე განუსაზღვრეს. არ დაგვავიწყდეს, რომ სააღდგომო დღესასწაულები ამ მონაკვეთში ექცევა და მასწავლებლები სრულიად დისკრიმინირებულ ვითარებაში აღმოჩნდნენ”, -განაცხადა ნანა ტოხვაძემ.

ინფორმაციას “სტრატეგია აღმაშენებლის” პრესსამსახური ავრცელებს.