საქართველოში პოლონეთის საელჩოსთან, პროფესიული კავშირების გაერთიანებამ გერმანიაში გაფიცული ქართველი ტრაილერის მძღოლების მხარდასაჭერი აქცია გამართა. სოლიდარობის აქციის პარალელურად კი 200-მდე ტრაილერის მძღოლი, რომელთაგან 50-მდე საქართველოს მოქალაქეა, ფრანკფურტში აქციას მართავდნენ.

როგორც პროფესიული კავშირების გაერთიანების თავმჯდომარის მოადგილემ, ლავრენტი ალანიამ განაცხადა, საპროტესტო აქციები მანამ გაგრძელდება, სანამ სატვირთო მანქანის მძღოლები ნამუშევარ ხელფასს არ აიღებენ.

„პირველ რიგში, სოლიდარობას ფრანკფურტში გაფიცულ 200-მდე მძღოლს ვუცხადებთ, საიდანაც 50 მძღოლი საქართველოს მოქალაქეა. მათ სამი თვის განმავლობაში ხელფასი არ აუღიათ. მას შემდეგ, რაც საქმეში რამდენიმე ქვეყნის პროფკავშირები ჩაერთო, დამსაქმებელი მძღოლებს ნამუშევრის ანაზღაურებას სიტყვიერად დაჰპირდა. მიუხედავად დაპირებისა, რამდენიმე დღის წინ დამსაქმებელმა პოლონეთიდან „შემცვლელი” მძღოლები ჩაიყვანა და დასაქმებულებისთვის ტრაილერების წართმევა სცადა. ადგილი ჰქონდა სიტყვიერ და ფიზიკურ დაპირისპირებას. გერმანიის პოლიციამ დამსაქმებელი და ყველა მისი თანმხლები პირი დააპატიმრა, შემდეგ კი, დაადეპორტა. დღეს ჩვენ პოლონეთის საელჩოსთან მოვედით, რათა პოლონეთის საელჩოში წერილი შევიტანოთ, რომ ხელისუფლებამ ყველა ბერკეტი გამოიყენოს, რაც კანონით მინიჭებულია და მძღოლებს სამმა პოლონურმა დამსაქმებელმა მათი ანაზღაურება დროულად გადაუხადოს”, - განაცხადა ლავრენტი ალანიამ.

დაზარალებული ქართველი ტრაილერის მძღოლის, ზვიად ლომიძის თქმით, მას პოლონელი დამსაქმებლისგან ორთვენახევრის ანაზღაურება არ აუღია.

„პოლონურ კომპანიაში მუშაობა 2021 წლის ნოემბერში დავიწყე. რამდენჯერმე ჩვენს შორის დადებული კონტრაქტის პირობები დაირღვა. მათ მოტყუებით გამომისტუმრეს და დამპირდნენ, რომ ხელფასს ჩამირიცხავდნენ. 10 მარტის შემდეგ ანაზღაურებას ორი კვირა პოლონეთში ველოდე, შემდეგ იძულებული გავხდი უკან საქართველოში დავბრუნებულიყავი. ამ ტყუილს უკვე საზღვრები არ აქვს. მინდა პოლონეთის საელჩოს მივაწვდინოთ ხმა, რომ ზომები ასეთი კრიმინალური საქციელის წინააღმდეგ მიიღონ ”, - განაცხადა ზვიად ლომიძემ.

აღსანიშნავია, რომ პროფესიული კავშირების გაერთიანების მიერ დაგეგმილ აქციას რესპუბლიკური საავადმყოფოს თანამშრომლები შეუერთდნენ.

ცნობისთვის, პროფკავშირების თავმჯდომარე, ირაკლი პეტრიაშვილი და მისი მოადგილე, რაისა ლიპარტელიანი გერმანიაში გაფიცულ ტრაილერის მძღოლებს ხვდებიან. პროფკავშირები საერთაშორისო პარტნიორებთან ერთად პოლონეთის მთავრობისთვის გასაგზავნ დოკუმენტს ამზადებს, სადაც ისინი პოლონეთის მთავრობას დამსაქმებელი კომპანიის საქმიანობის შესწავლას მოსთხოვენ.