თბილისის ივანე ჯავახიშვილის სახელობის სახელმწიფო უნივერსიტეტის საკალათბურთო გუნდი „თსუ“ საქართველოს თასის მფლობელი გახდა.
როგორც თსუ-ის მიერ გავრცელებულ ინფორმაციაშია ნათქვამი, ფინალურ შეხვედრაში თსუ-მა ბათუმის „ბათუმი“ დაძაბულ ბრძოლაში ანგარიშით 78:76 დაამარცხა. მატჩის საუკეთესო კალათბურთელად კი თსუ-ელი კორი ბოუენი დასახელდა. „თსუ“ საქართველოს თასს მეორედ დაეუფლა, უნივერსიტეტის გუნდი პირველად თასის მფლობელი 2006 წელს გახდა.
მათივე ცნობით, საკალათბურთო გუნდის საგულშემატკივროდ თსუ სტუდენტები, პროფესორები, ადმინისტრაციის თანამშრომლები თსუ მაღლივ კორპუსთან შეიკრიბნენ და ოლიმპიური სპორტის სასახლისკენ მსვლელობა მოაწყვეს.
„საქართველოს ჩემპიონატს ძალიან აკლია ასეთი გულშემატკივრობა. მათ ძალიან კარგი საკალათბურთო გარემო შექმნეს. ყველამ ისიამოვნა ამ დაძაბული თამაშით, რომლის ბედი ბოლო წუთებში გადაწყდა. ბიჭები ფიზიკურად და ემოციურად ძალიან დაღლილები ვართ, რადგან ორი დღე ზედიზედ მოგვიწია ნახევარფინალისა და ფინალის თამაში. მაგრამ ჩვენდა სასიხარულოდ გავიმარჯვეთ და მოვიპოვეთ თასი. წინ ეროვნული ჩემპიონატია და ყველაფერი ამით არ მთავრდება,“- აღნიშნა თსუ-ისა და საქართველოს ეროვნული ნაკრების კალათბურთელმა გიორგი ცინცაძემ.
მატჩის შემდეგ თსუ-ს რექტორმა ჯაბა სამუშიამ გამარჯვება მიულოცა თსუ-ს კალათბურთელებსა და გულშემატკივრებს და აღნიშნა, რომ ეს გამარჯვება საუნივერსიტეტო სპორტის, პირველ რიგში კი თსუ-ს გამარჯვებაა.
„ძალიან ემოციური დღეა. ვულოცავ თსუ-ს ამ დიდ წარმატებას. ეს არის იმ დიდი ტრადიციის გაგრძელება, რომელიც თსუ-ს ათწლეულების განმავლობაში ჰქონდა სპორტის ამ სახეობაში,“- განაცხადა ჯაბა სამუშიამ.
ფინალამდე თსუ-მა ნახევარფინალში საკალათბურთო გუნდი „ოლიმპი“ ანგარიშით 87:84 დაამარცხა.
