ირლანდიის რესპუბლიკაში აშშ-ის პრეზიდენტ ჯო ბაიდენის ოფიციალური ვიზიტი გრძელდება. ბაიდენი ირლანდიის რესპუბლიკის პრეზიდენტ მაიკლ ჰიგინსს და ირლანდიის პრემიერ-მინისტრ ლეო ვარადკარს შეხვდა. აშშ-ის პრეზიდენტს დაგეგმილი აქვს ირლანდიის პარლამენტს მიმართოს. ის აშშ-ის რიგით მე-4 პრეზიდენტი იქნება, რომელიც ოფიციალური ვიზიტის ფარგლებში ირლანდიის პარლამენტში სიტყვით გამოვა.

ბაიდენი ირლანდიის რესპუბლიკას ბელფასტის, იგივე „კარგი პარასკევის“ შეთანხმების მიღწევიდან 25 წლის გასვლასთან დაკავშირებით ეწვია. 1998 წლის შეთანხმებამ, რომელიც ორივე მხარისთვის მისაღები იყო, ბრიტანეთსა და ირლანდიას შორის არსებული 30-წლიანი დაპირისპირება მოაგვარა.