ამერიკის შეერთებული შტატები რუსეთის ფედერაციის დაყადაღებული აქტივების უკრაინაში განადგურებული ინფრასტრუქტურის აღსადგენად გამოყენებას განიხილავს, - უკრაინული მედიის ინფორმაციით, ამის შესახებ აშშ-ის სახელმწიფო მდივნის მოადგილემ პოლიტიკურ საკითხებში, ვიქტორია ნულანდმა აშშ-უკრაინის პარტნიორობის ფორუმზე სიტყვით გამოსვლისას განაცხადა.

„სხვა საკითხებთან ერთად, ვმუშაობთ იმაზე, რომ რუსეთმა გადაიხადოს იმისთვის, რაც გაანადგურა“, - აღნიშნა მან.

ნულანდის თქმით, აშშ-ის იუსტიციის სამინისტრომ, კონგრესის მხარდაჭერით, მიიღო უფლებამოსილება, რუსი ოლიგარქებისგან ჩამორთმეული უკანონო აქტივები უკრაინის აღდგენის მიზნით გამოიყენოს.

„თებერვალში ჩვენ გამოვაცხადეთ პირველი ტრანში 5.4 მილიონი აშშ დოლარის ოდენობით ამ უფლებამოსილების ფარგლებში და მოგვიანებით იქნება მეტი განცხადებები“, - დასძინა ამერიკელმა მაღალჩინოსანმა.

ვიქტორია ნულანდის განცხადებით, აშშ-სა და სხვა ქვეყნების მიერ გაყინული რუსეთის ცენტრალური ბანკის დაახლოებით 300 მილიარდი დოლარის ღირებულების აქტივების მოზიდვის შესაძლებლობის შესახებ დისკუსიები გრძელდება.