სერბეთს არასოდეს მიუყიდია იარაღი ან საბრძოლო მასალა უკრაინისთვის, ან რუსეთისთვის, თუმცა სერბულმა იარაღმა ბრძოლის ველს, შესაძლოა, მესამე ქვეყნების გავლით მიაღწია, - ამის შესახებ სერბეთის პრეზიდენტმა, ალექსანდრ ვუჩიჩმა განაცხადა.

„სერბეთი არ ახორციელებს და არ განახორციელებს იარაღის ექსპორტს უკრაინაში. ის არ ახორციელებს და არ განახორციელებს იარაღისა და საბრძოლო მასალის ექსპორტს რუსეთში, არ არსებობს არანაირი დოკუმენტი, რომელიც ამას დაადასტურებს“, - განაცხადა ვუჩიჩმა.

მისი განმარტებით, სრულიად დარწმუნებულია, რომ სერბული საბრძოლო მასალა, თურქეთში, ესპანეთში ან ჩეხეთში ექსპორტის შემდეგ, ერთ ან მეორე მხარეს ბრძოლის ველზე აღმოჩნდება.

შეგახსენებთ, გუშინ Reuters-მა გაავრცელა ინფორმაცია, რომ პენტაგონის ერთ-ერთი საიდუმლო დოკუმენტის თანახმად, რომელმაც სოციალურ ქსელებში გაჟონა, ბელგრადი კიევისთვის იარაღის მიწოდებას დათანხმდა.