უკრაინის ეროვნული უსაფრთხოებისა და თავდაცვის საბჭოს მდივნის, ოლექსი დანილოვის თქმით, პენტაგონის „გაჟონილ“ დოკუმენტებში უკრაინის სამხედრო გეგმების შესახებ ანალიზს საფუძველი არ გააჩნია.

დანილოვის თქმით, პენტაგონს უკრაინის შეიარაღებული ძალების კონტრიერიშის გეგმებზე წვდომა არ ჰქონდა. მან აღნიშნა, რომ უკრაინის ხელმძღვანელობას მოვლენათა განვითარების რამდენიმე ვარიანტი აქვს.

„გააზრებულად ვეკიდებით ყველა პროცესს, რაც ფრონტზე ხდება. უკრაინელი სამხედროების გეგმების შესახებ ყველა ვარაუდს, მათ შორის კონტრიერიშის შესახებ, საფუძველი არ გააჩნია. ეს ყველაფერი ბოლო მომენტში გადაწყდება, საბოლოო გადაწყვეტილების მიღებისას“, - განაცხადა დანილოვმა.

მან ასევე აღნიშნა, რომ უკრაინის შეიარაღებული ძალების ხელმძღვანელობა არა მხოლოდ კონტრიერიშის გეგმაზე, არამედ 1991 წლის საზღვრებამდე უკრაინის ტერიტორიის გათავისუფლების სტრატეგიაზეც მუშაობს.