საქართველოს ტექნიკური უნივერსიტეტის „ქალთა ასოციაციის“ ხელმძღვანელმა, სტუ-ის ქიმიური ტექნოლოგიებისა და მეტალურგიის ფაკულტეტის ქიმიური და ბიოლოგიური ტექნოლოგიების დეპარტამენტის უფროსმა, პროფესორმა ნაზი კუციავამ და ასოციაციის წევრებმა „თბილისის ხანდაზმულთა პანსიონატის“ ბენეფიციარებს აღდგომის ბრწყინვალე დღესასწაული მიულოცეს. ამის შესახებ ინფორმაციას სტუ ავრცელებს.

მათივე ცნობით, საქველმოქმედო ღონისძიების ინიციატორის და მხარდამჭერის, საქართველოს ტექნიკური უნივერსიტეტის რექტორის, პროფესორ დავით გურგენიძის სახელით, „ქალთა ასოციაციამ“ „თბილისის ხანდაზმულთა პანსიონატის“ ბენეფიციარებს სასაჩუქრე პაკეტები გადასცა.

პროფესორ ნაზი კუციავას განცხადებით, ტექნიკური უნივერსიტეტი ტრადიციას აგრძელებს და ამჯერად, საქველმოქმედო აქცია „თბილისის ხანდაზმულთა პანსიონატის“ ბენეფიციარებისთვის გამართა.

„საქართველოს ტექნიკური უნივერსიტეტის რექტორის ინიციატივითა და ადმინისტრაციის ხელმძღვანელის მხარდაჭერით, სტუ-ის „ქალთა ასოციაციამ“ „თბილისის ხანდაზმულთა პანსიონატში“ მცხოვრებ 17 ბენეფიციარს ერთი ლამაზი დღე აჩუქა. ჩვენ კიდევ ერთხელ გავუსვით ხაზი ამ ადამიანებისადმი დამოკიდებულებას, მივულოცეთ მაცხოვრის ბრწყინვალე აღდგომა და სასაჩუქრე პაკეტები გადავეცით. აღსანიშნავია, რომ ეს არ არის, „ქალთა ასოციაციის“ მიერ ჩატარებული პირველი საქველმოქმედო ღონისძიება. სტუ-ის რექტორის და ადმინისტრაციის მხარდაჭერით ჩვენ დავნერგეთ ერთგვარი ტრადიცია, რომლის ფარგლებშიც სხვადასხვა დროს აქციებს ვმართავთ დევნილებისთვის, ხანდაზმულებისა და ლტოლვილებისთვის. ამჯერად, საქართველოს ტექნიკური უნივერსიტეტის რექტორმა გადაწყვიტა ხანდაზმული ადამიანებისთვის გვეჩუქებინა ბედნიერების წუთები. პანსიონატის მობინადრეები დიდი სიხარულით შეგვხვდნენ, რაც ნიშნავს იმას, რომ ჩვენი მისია წარმატებით შესრულდა“, - განაცხადა ნაზი კუციავამ.

ღონისძიების დასასრულს, „თბილისის ხანდაზმულთა პანსიონატის“ ბენეფიციარებმა მადლობა გადაუხადეს საქართველოს ტექნიკური უნივერსიტეტის რექტორს და „ქალთა ასოციაციას“ თანადგომისა და ყურადღებისთვის.