რუსული ძალები ბახმუტში მძიმე არტილერიის გამოყენებით დაბომბვას და საჰაერო დარტყმებს აძლიერებს, - ამის შესახებ უკრაინის სახმელეთო ჯარების სარდალმა, ალექსანდრ სირსკიმ განაცხადა.

„ამჟამად, მტერი აძლიერებს მძიმე არტილერიის მოქმედებას და ავიაიერიშების რაოდენობას და ქალაქს ნანგრევებად აქცევს“, - აღნიშნა უკრაინელმა გენერალმა.

მისი თქმით, რუსეთი კვლავ ცდილობს ბახმუტის ნებისმიერი ფასად აღებას, მაგრამ ქალაქისთვის ბრძოლაში მნიშვნელოვან ზარალს განიცდის.

ცნობისათვის, გაერთიანებული სამეფოს თავდაცვის სამინისტროს დღევანდელი ანგარიშის თანახმად, „არსებობს რეალური შესაძლებლობა, რომ რუსეთმა შეამციროს ჯარების რაოდენობა და შეტევითი მოქმედებები ქალაქ დონეცკის ირგვლივ და დიდი ალბათობით, რესურსები ბახმუტის სექტორისკენ გადაიტანოს“.