უკრაინა პოლონეთთან საკუთარი მარცვლეულის ტრანზიტის განბლოკვის შესახებ შეთანხმდა. ინფორმაციას ამის შესახებ უკრაინის ვიცე-პრემიერი, ეკონომიკის მინისტრი იულია სვირიდენკო ავრცელებს.

“მოლაპარაკებების შედეგად გადაწყდა, რომ პოლონეთის ტერიტორიის გავლით უკრაინული საქონლის ტრანზიტი ოთხშაბათიდან პარასკევამდე ღამეს განიბლოკება”, - განაცხადა სვირიდენკომ.

მან აღნიშნა, რომ უკრაინას ესმის პოლონელი ფერმერების მდგომარეობა ისევე, როგორც პოლონურ მხარეს ესმის უკრაინელი ფერმერების მდგომარეობა, რომელთაც სირთულეები ექმნებათ უკრაინაში რუსეთის ფართომასშტაბიანი შეჭრის შედეგად.

“საბოლოო ჯამში, ამ მდგომარეობის თავდაპირველი მიზეზი სწორედ რუსული აგრესიაა და ყველაფერს ვიზამთ, რათა რუსეთმა ვითარებით არ ისარგებლოს”, - განაცხადა სვირიდენკომ.

ცნობისთვის უკანასკნელ დღეებში პოლონეთმა, უნგრეთმა და სლოვაკეთმა უკრაინული სასოფლო-სამეურნეო პროდუქციის იმპორტი აკრძალეს. ვარშავამ კი, არა მხოლოდ იმპორტი, არამედ ტრანზიტიც აკრძალა.