ევროკომისია მიესალმა უკრაინასა და პოლონეთს შორის მიღწეულ შეთანხმებას, რომელიც უკრაინული მარცვლეულის ტრანზიტს შეეხება, თუმცა ოფიციალური ვარშავის ცალმხრივი მოქმედება დაგმო. ამის შესახებ ევროკომისიის პრეს-მდივანმა მირიამ გარსია ფერერმა პოლონური სააგენტოსთვის მიცემულ კომენტარში განაცხადა.

როგორც მან აღნიშნა, ევროკომისიას არ შეუცვლია თავისი დამოკიდებულება ვარშავის ცალმხრივი მოქმედებების მიუღებლობასთან დაკავშირებით.

„ჩვენ მივესალმებით ამ განცხადებას, როგორც გამოსავლისკენ გადადგმულ პირველ ნაბიჯს. თუმცა ჩვენ არ ვცვლით ჩვენს პოზიციას, რომ ცალმხრივი მოქმედებები მიუღებელია.

სოლიდარობის მარშრუტების ძირითადი მიზანი უკრაინისთვის თავისი სოფლის მეურნეობის პროდუქციის ექსპორტის ალტერნატიული გზების შეთავაზება იყო, რაც უნდა იყოს უკრაინის ეკონომიკის ფუნქციონირების გარანტია შავი ზღვის პორტების ბლოკირების პირობებში. ამიტომ მნიშვნელოვანია იმის უზრუნველყოფა, რომ ტრანზიტი იყოს და რომ მარცვლეული მოხვდეს იმ ქვეყნებში, სადაც ის ყველაზე მეტად ესაჭიროებათ,“- განაცხადა ევროკომისიის წარმომადგენელმა.

ცნობისთვის, უკრაინა პოლონეთთან საკუთარი მარცვლეულის ტრანზიტის განბლოკვის შესახებ შეთანხმდა. ინფორმაციას ამის შესახებ უკრაინის ვიცე-პრემიერი, ეკონომიკის მინისტრი იულია სვირიდენკო ავრცელებს.

„მოლაპარაკებების შედეგად გადაწყდა, რომ პოლონეთის ტერიტორიის გავლით უკრაინული საქონლის ტრანზიტი ოთხშაბათიდან პარასკევამდე ღამეს განიბლოკება”, - განაცხადა სვირიდენკომ.