განათლების მინისტრი გიორგი ამილახვარი 21 აპრილს, მასწავლებლებს შეხვდება. როგორც მინისტრი ჟურნალისტებთან საუბრისას განმარტავს, შეხვედრაზე სასკოლო და ასევე, მასწავლებლების კარიერულ განვითარებასთან დაკავშირებულ პრობლემებს განიხილავენ.

გიორგი ამილახვარის თქმით, მასწავლებლებთან შეხვედრები მომავალშიც გაგრძელდება.

„მე პირველივე დღეებში დავაანონსე, რომ აქტიურ კომუნიკაციას დავიწყებდი ადამიანთან, ვინც ჩართულია განათლებაში, განსაკუთრებით მასწავლებლებთან. არის რიგი საკითხები, პრობლემები, რომლებიც მასწავლებლებს აწუხებთ და დაგროვებულია. მოგვმართეს უკვე, მე პირადად მომმართეს, შესაბამისად, ამ საკითხებთან დაკავშირებით გვინდა მათთან გასაუბრება, მათი მოსმენა, თუ როგორ ხედავენ ისინი სასკოლო საკითხებთან და მათი კარიერული განვითარების საკითხებთან დაკავშირებული პრობლემების მოგვარებას. თქვენ იცით, რომ მე მრჩევლად და კონსულტანტად მოვიწვიე გია მურღულია და ზოგადი განათლების მიმართულებით სამუშაო ჯგუფი შევქმენით, რომელიც სწორედ ყველა იმ საკითხზე და გამოწვევაზე იმუშავებს, რომელიც დღეს აწუხებს და ადარდებს მასწავლებელს, მშობელს და ბავშვს. ეს არის მიზანი, რომ ხვალ ვხვდებით მასწავლებლებს. ეს შეხვედრები გაგრძელდება და მომდევნო კვირებში იქნება ინტენსიური, რომ მასწავლებლების რაც შეიძლება ფართო მასები მოვიცვათ,“ - განაცხადა ამილახვარმა.