საქართველოს ენერგეტიკისა და წყალმომარაგების მარეგულირებელ ეროვნულ კომისიაში (სემეკ) ევროკავშირის დაფინანსებით მიმდინარე ტვინინგის პროექტი - „მწვანე ენერგიის რეგულირება საქართველოში“ დასრულდა. ინფორმაციას სემეკი ავრცელებს.

მათივე ცნობით, ღონისძიება სემეკის წევრმა, პროექტის ლიდერმა საქართველოს მხრიდან, გიორგი ფანგანმა და პროექტის ლიდერმა ევროკავშირის წევრი სახელმწიფოს მხრიდან, დიტმარ პრეინსტორფერმა გახსნეს. მათ ხაზი გაუსვეს პროექტის მიღწევებსა და ეფექტიან შედეგებს.

ღონისძიებაზე ძირითადი მოხსენებით სემეკის თავმჯდომარე დავით ნარმანია, საქართველოს ეკონომიკისა და მდგრადი განვითარების მინისტრის პირველი მოადგილე რომეო მიქაუტაძე და საქართველოს საგარეო საქმეთა მინისტრის მოადგილე, თეიმურაზ ჯანჯალია წარსდგნენ.

სემეკის თავმჯდომარის დავით ნარმანიას თქმით, ევროკავშირის დაფინანსებით სემეკში არაერთი წარმატებული პროექტი განხორციელდა.

„ბოლო 10 წლის განმავლობაში, ევროკავშირის დაფინანსებით სემეკში არაერთი უმსხვილესი პროექტი განხორციელდა, რომლებიც სხვადასხვა მიმართულებით კომისიის საქმიანობის გაუმჯობესებაში დაგვეხმარა. დაძმობილების პროგრამის ფარგლებში სემეკმა სატარიფო მეთოდოლოგიები შეიმუშავა, რომლის საფუძველზეც გამჭვირვალე და სამართლიანი ტარიფების დადგენა მიმდინარეობს, შემუშავდა ბაზრის მონიტორინგისა და აუდიტის წესები, განხორციელდა ჭკვიანი აღრიცხვის დანერგვის ხარჯ-სარგებლიანობის ანალიზი და შემუშავდა ჭკვიანი აღრიცხვის მხარდამჭერი მარეგულირებელი სტრატეგიის პროექტი, შემუშავდა დიგიტალიზაციის სტრატეგიის პროექტი.

გარდა ტვინინგის პროექტებისა, სემეკში, ევროკავშირის დაფინანსებით სხვა პროგრამებიც ხორციელდება. მათ შორის, იწყება ტექნიკური დახმარებისა და ინფორმაციის გაცვლის ინსტრუმენტის პროგრამა (TAIEX), რომელიც სემეკს დაეხმარება ელექტროენერგიის დამგროვებელი ბატარეების დანერგვასა და რეგულაციებში, რასაც ელექტრული ქსელის საიმედოობის გაუმჯობესების კუთხით დადებითი ეფექტი ექნება. ვიმედოვნებ, რომ ჩვენი თანამშრომლობა ევროკავშირის პროექტების ფარგლებში გაგრძელდება და კიდევ უფრო მეტად ეფექტიანი იქნება,“ - განაცხადა დავით ნარმანიამ.

სემეკის წევრმა და პროექტის ლიდერმა საქართველოს მხრიდან, გიორგი ფანგანმა სემეკში რიგით მე-4 ტვინინგის პროექტის მიმდინარეობა დადებითად შეაფასა და საქართველოს ენერგეტიკის სექტორის განვითარებაში ევროკავშირის როლს ხაზი გაუსვა.

„საქართველოს ენერგეტიკულ სექტორში ფუნდამენტური რეფორმა ხორციელდება, რომლის მიზანია ქართული კანონმდებლობის შესაბამისობაში მოყვანა ევროკავშირის კანონმდებლობასთან. სემეკი მუდმივად აუმჯობესებს რეგულაციებს, რათა უზრუნველყოფილი იყოს ყველაზე მიმზიდველი მარეგულირებელი გარემო როგორც მომხმარებლებისთვის, ასევე ენერგეტიკის სექტორში მოქმედი კომპანიებისთვის. ამ პროცესში ძალიან მნიშვნელოვანია ევროპის წამყვანი ორგანიზაციების ცოდნისა და გამოცდილების გაზიარება. მინდა მადლობა გადავუხადო ევროკავშირს ასეთი შესაძლებლობისთვის, რომელსაც სემეკი ღებულობს როგორც ტვინინგის პროექტების, ასევე სხვა ინსტრუმენტების დახმარებით“, - განაცხადა გიორგი ფანგანმა.

ევროკავშირის წევრი სახელმწიფოს მხრიდან პროექტის ლიდერის, დიტმარ პრეინსტორფერის თქმით, პროექტს ყველა კომპონენტში მნიშვნელოვანი მიღწევები აქვს.

„პროექტის ხელმძღვანელობა ჩემთვის დიდი პატივი იყო. ვმუშაობდი შესანიშნავ ექსპერტებთან ერთად სხვადასხვა ორგანიზაციებიდან. მოვახერხეთ ცოდნისა და გამოცდილების გაზიარება ქსელური ტარიფების, მოთხოვნის მართვისა და განახლებადი ენერგიების რეგულირების საკითხებზე. მინდა მადლობა გადავუხადო სემეკის მენეჯმენტს და ყველა ექსპერტს შეტანილი წვლილისთვის“, - აღნიშნა დიტმარ პრეინსტორფერმა,

„ღონისძიებაზე მონაწილეებს მისასალმებელი სიტყვით მიმართეს ავსტრიის რესპუბლიკის სრულუფლებიანი და საგანგებო ელჩმა საქართველოში თომას მულმანმა, გერმანიის ფედერალური რესპუბლიკის სრულფასოვანმა და საგანგებო ელჩმა საქართველოში ერნსტ პეტერ ფიშერმა, საქართველოში ევროკავშირის წარმომადგენლობის პროექტების განყოფილების უფროსმა კატალინ გერმანმა. მათი თქმით, ევროკავშირის მიერ დაფინანსებული ტვინინგის პროექტი წარმატებით დასრულდა და სემეკის მხარდაჭერით მნიშვნელოვან შედეგებს მიაღწია.

ევროკავშირის მიერ 1, 500 000 ევროთი დაფინანსებული საჯარო სამსახურების დაძმობილების რიგით მე-4 პროექტის - „მწვანე ენერგიის რეგულირება საქართველოში“ მიზანს წარმოადგენდა განახლებადი ენერგიების განვითარების პროცესის მხარდაჭერა საქართველოს ელექტროენერგიისა და ბუნებრივი გაზის ბაზრებზე არსებული მარეგულირებელი ჩარჩოს ევროკავშირის სტანდარტებთან მისადაგებით. პროექტის ხანგრძლივობა იყო 27 თვე, რომელიც ავსტრიის ენერგეტიკის მარეგულირებელი უწყების (E-Control) მიერ გერმანიის ფედერალური ქსელის სააგენტოსთან (BNetzA) თანამშრომლობით განხორციელდა. პროექტის პირდაპირი ბენეფიციარი იყო საქართველოს ენერგეტიკისა და წყალმომარაგების მარეგულირებელი ეროვნული კომისია (სემეკი),“ - აღნიშნულია გავრცელებულ ინფორმაციაში.