საქართველოს პარლამენტში ოპოზიციონერმა ქალმა დეპუტატებმა ბრიფინგი გამართეს და პრემიერ-მინისტრს ირაკლი ღარიბაშვილს მოუწოდეს, რომ აქონდროპლაზიის დიაგნოზის მქონე ბავშვების დედებს შეხვდეს.

„ლელოს" დეპუტატის ანა ნაცვლიშვილის განცხადებით, ბავშვებისთვის აუცილებელი მედიკამენტის საკითხი სწრაფად უნდა გადაიჭრას.

"ჩვენ გვინდა სრული მხარდაჭერა და სოლიდარობა გამოვუცხადოთ აქონდროპლაზიის დიაგნოზის მქონე ბავშვების დედებს, რომლებიც მერამდენე დღეა ათენებენ საქართველოს კანცელარიის წინ და ითხოვენ სასიცოცხლოდ მნიშვნელოვან გადაწყვეტილებას მათი შვილებისთვის. ჩვენ მივმართავთ საქართველოს პრემიერ-მინისტრს გამოიჩინოს ელემენტარული ადამიანობა და შეხვდეს ბავშვების დედებს, რომლებიც ქარში, წვიმაში, მზეში და ყველანაირ ამინდში დგანან და ითხოვენ პრემიერთან შეხვედრას. შეხვდით ბატონო პრემიერო, დედები ითხოვენ თქვენთან შეხვედრას. მოვუწოდებთ მას დაუყოვნებლივ მიიღოს ზომები, რომ ამ ბავშვებისთვის აუცილებელი მედიკამენტის საკითხი გადაიჭრას უსწრაფესად. ამ ბავშვებს და მათ ჯანმრთელობას არ აქვთ ფუფუნების უფლება, რომ ელოდონ თვეები და წლები ამ გადაწყვეტილებას. მათ აქვთ ცოტა დრო, რომ ამ წამალმა იმუშაოს მათი ჯანმრთელობის სასარგებლოდ. უსწრაფესი გადაწყვეტილებაა საჭირო", - განაცხადა ანა ნაცვლიშვილმა.