DW Akademie-მ კვლევის სახელწოდებით - „პოლარიზაციასა და დეზინფორმაციას შორის - მედიის მდგომარეობა საქართველოში“ პრეზენტაცია გამართა.

DW Akademie-ის კვლევა საქართველოში გამოხატვის თავისუფლებასა და მედიათავისუფლებასთან დაკავშირებით არსებულ სიტუაციას ასახავს.

კვლევის ერთ-ერთი ავტორის, ეკატერინე ბასილაიას განცხადებით, კვლევამ ცხადყო, რომ ქართულ მედია გარემოში დომინირებს დეზინფორმაცია, პროპაგანდა და პოლარიზაცია.

„კვლევა „დოიჩე ველეს“ აკადემიამ ჩაატარა. კლევის მიზანი 2022 წელს რუსეთის უკრაინაში შეჭრის პარალელურად საქართველოში მიმდინარე მოვლენების შესწავლა იყო. აგრეთვე, ის პროცესები, რომელიც შესაძლებელია ქართულ მედია გარემოზეც ასახულიყო. მზარდი დეზინფორმაცია, პროპაგანდა და პოლარიზაცია, ეს არის ის გამოწვევები, რომელიც საქართველოში მედია გარემოს აქვს. კვლევაში მონაწილეობა 80-მდე ჟურნალისტმა მიიღო. კლევის შედეგებმა ის გამოწვევები გამოკვეთა, რომლებიც საქართველოს მედია გარემოს გააჩნია. ეს გულისხმობს პოლარიზაციას, ხელისუფლების მხრიდან მედიაზე ზეწოლას”, - განაცხადა ეკატერინე ბასილაიამ.

მისივე თქმით, ქართული მედია რთულ ეკონომიკურ ვითარებაში მუშაობს.

„ასევე, კვლევის შედეგად გამოიკვეთა საკითხი, რომელიც „მთავარი არხის“ დირექტორის, ნიკა გვარამიას დაკავებას ეხება. ამავე დროს, ფინანსური გამოწვევები, რომელიც მედიას გააჩნია, დამოუკიდებელი და თავისუფალი ოპერირებისთვის. ჟურნალისტების უსაფრთხოების თემა, რომელიც კრიტიკულად 2021 წლის 5 ივლისის მოვლენების შემდგომ დადგა.

რაც შეეხება რეკომენდაციებს, რეკომენდაციები თავად ჟურნალისტებისგან ავაგროვეთ და როგორც ისინი ამბობენ, მნიშვნელოვანია საერთაშორისო მხარდაჭერა, ცოდნის გაცვლა, ადვოკატირება და ფინანსური მხარდაჭერა დამოუკიდებელი მედიისთვის”,- განაცხადა ეკატერინე ბასილაიამ.

„დოიჩე ველეს” წარმომადგენლის, ელენა ზონდლერის თქმით, კვლევის მთავარი მიზანი, ქართული მედია გარემოს შესწავლა და პრობლემური საკითხების გამოკვლევა იყო.

„დღეს ჩვენ კვლევის პრეზენტაცია „დოიჩე ველეს“ აკადემიასთან ერთად განვახორციელეთ. კვლევის მთავარი ამოცანა ქართული მედია გარემოს შესწავლა იყო, ასევე ქართული მედიის პრობლემური საკითხების გამოკვლევა. ჩვენი ერთ-ერთი მიმართულება არის ის, რომ საქართველოს მთავრობამდე მივიტანოთ ხმა, რომ მასმედიის ადვოკატირება საერთაშორისო დონეზე ხდება“, - განაცხადა ელენა ზონდლერმა.