სამწუხაროდ, მედიკამენტ „ვოსორიტიდთან“ დაკავშირებით ჩვენ ასეთი რეალობა გვაქვს - არ არსებობს არცერთი ქვეყანა ჯერჯერობით, რომელსაც აქვს რაიმე კონკრეტული პროტოკოლი ამ მედიკამენტთან დაკავშირებით, - ამის შესახებ რესპუბლიკური საავადმყოფოს კლინიკურმა ექსპერტმა, პროფესორმა მაკა ბულეიშვილმა „პალიტრანიუსის“ გადაცემაში „360 გრადუსი“ განაცხადა, როდესაც აქონდროპლაზიის სინდრომის მქონე ბავშვთა საკითხზე ისაუბრა.

როგორც მან განმარტა, მედიკამენტი „ვოსორიტიდი“ ჯერჯერობით არცერთ ქვეყანაში სახელმწიფო დაფინანსების პროგრამაში არ არის.

„არის ისეთი ქვეყნები, სადაც გარკვეულწილად დაწყებულია აღნიშნული პრეპარატის გამოყენება, მაგრამ არცერთ ქვეყანაში ჯერჯერობით, მიმდინარე წლის მონაცემებით, არსად არ არის სახელმწიფო დაფინანსებაში ჩასმული ეს მედიკამენტი“, - განაცხადა ბულეიშვილმა.

მისი თქმით, თუკი ევროკავშირის რამდენიმე ქვეყანაში აღნიშნული მედიკამენტის სახელმწიფო დაფინანსებაში ჩასმა გადაწყდება, შესაძლებელია ეს საქართველოშიც ასე მოხდეს.

როგორც მაკა ბულეიშვილმა აღნიშნა, არსებობს იშვიათი დაავადებების საკითხზე მომუშავე სპეციალური საკოორდინაციო საბჭო და ჯანდაცვის სამინისტრო ჯანმრთელობის მსოფლიო ორგანიზაციიდან იღებს ინფორმაციას კონკრეტული მედიკამენტის ქვეყანაში შემოტანასთან დაკავშირებით.

მაკა ბულეიშვილის განმარტებით, დეტალური ინფორმაციის საფუძველზე მოხდება მედიკამენტ „ვოსორიტიდის“ შემოტანასთან დაკავშირებით გადაწყვეტილების მიღება.

„ჯერჯერობით, როგორც ჩვენთვის, ისევე ევროკავშირის ქვეყნებისთვისაც ბოლომდე არ არის ცნობილი მედიკამენტის გვერდითი მოვლენები. რაც შეეხება დაფინანსებას და იმ თემებს, რაც ვფიქრობ, ძალიან მნიშვნელოვანია, დაავადებები, რომელიც ამ ბავშვებს აქვთ, თუ მათი დაფინანსება მოხდება ჯანდაცვის სამინისტროს მიერ პროგრამით, ეს იქნება ძალიან მნიშვნელოვანი წინგადადგმული ნაბიჯი“, - განაცხადა ბულეიშვილმა.

შეგახსენებთ, აქონდროპლაზიით დაავადებული ბავშვების მშობლები მთავრობის ადმინისტრაციასთან რამდენიმე დღეა აქციას მართავენ. ისინი პრემიერ-მინისტრთან შეხვედრას ითხოვენ, რათა მათი შვილების მკურნალობისთვის საჭირო პრეპარატის შეძენა სახელმწიფოს მხრიდან დაფინანსდეს.