მიხეილ სააკაშვილის ჯანმრთელობის მდგომარეობა სტაბილურია, მაგრამ საყურადღებო, - ამის შესახებ „ვივამედის“ ექიმმა თამარ ჭანტურიამ, საქართველოს მესამე პრეზიდენტის, მიხეილ სააკაშვილის მდგომარეობაზე საუბრისას განაცხადა.

როგორც ჭანტურია განმარტავს, მიხეილ სააკაშვილმა გუშინ სავარძლიდან წამოდგომისას გონება დაკარგა.

„მიხეილ სააკაშვილთან სტაბილური მდგომარეობაა, მაგრამ საყურადღებო. დედამისისა და პაციენტის გადმოცემით, სავარძლიდან წამოდგომისას ჰქონდა გონების დაკარგვა და დავარდა. მეორე შემთხვევა იყო, როდესაც გადადიოდა სავარძლიდან საწოლისკენ ექთანზე დაყრდნობით, ჩაიმუხლა, გონების კარგვას ადგილი არ ჰქონია. როგორც კი შევედით, პაციენტი კონტაქტური და ადეკვატური იყო, აღენიშნებოდა თავბრუსხვევაც“,- აღნიშნავს ექიმი „საზოგადოებრივ მაუწყებელთან“.

შეგახსენებთ, გუშინ მიხეილ სააკაშვილის დედამ, გიული ალასანიამ განაცხადა, რომ საქართველოს მესამე პრეზიდენტმა კლინიკაში გონება ორჯერ დაკარგა.