მთავრობის ადმინისტრაციასთან აქონდროპლაზიის სინდრომის მქონე ბავშვების მშობლები საპროტესტო აქციას ისევ მართავენ. ისინი უკვე მეექვსეა დღეა მთავრობის ადმინისტრაციასთან ღამეს ათენებენ და პრემიერ-მინისტრთან შეხვედრას მოითხოვენ.

იშვიათი დაავადების მქონე 12 ბავშვის მშობელი ასევე ითხოვს, სახელმწიფომ დააფინანსოს საქართველოში მედიკამენტ „ვოსორიტიდის“ შემოტანა. მშობლების განცხადებით, ეს მედიკამენტი მათი შვილებისთვის სასიცოცხლოდ მნიშვნელოვანია.

აქციის მონაწილეებმა გზის გადაკეტვაც სცადეს, რის საშუალებაც მათ სამართალდამცველებმა არ მისცეს. პოლიციასთან წინააღმდეგობის დროს ერთ-ერთმა მშობელმა გონება დაკარგა და ადგილზე სასწრაფო დახმარება გამოიძახეს.

ადგილზე იმყოფებოდა სახალხო დამცველის წარმომადგენელი, ლიკა წიკლაური. მისი განცხადებით, ომბუდსმენის აპარატი ყველა შესაძლებლობას იყენებს იმისთვის, რომ ეს საკითხი დროულად გადაწყდეს.

„ჩვენ არ გვაქვს ისეთ ბერკეტი, რომ პირდაპირ მოვითხოვოთ რამე რომ გაკეთდეს, თუმცა შეგვიძლია მედიაციის ფუნქციით ამ საკითხის განხილვა დაჩქარდეს, გვქონდეს სამინისტროსთან კომუნიკაცია და ამ შესაძლებლობას მაქსიმალურად ვიყენებთ. ყოველდღიურად ვართ კომუნიკაციაში, განიხილება ეს საკითხი. სამინისტროს მხრიდან არ არის დახურული. ვიმედოვნებთ, ბავშვების ინტერესების შესაბამისად იქნება გადაწყვეტილება მიღებული“, - განაცხადა წიკლაურმა.