პრემიერ-მინისტრმა გვითხრას, გვიფინანსებს თუ არა მედიკამენტს. წირავს ჩვენს შვილებს სამუდამო ტკივილისა და ტანჯვისთვის თუ ჯანმრთელობის უფლებას აძლევს, - ამის შესახებ აქონდროპლაზიის დიაგნოზის მქონე ბავშვების მშობლებმა მთავრობის კანცელარიასთან საგანგებო განცხადებისას აღნიშნეს.

მათი თქმით, იმ შემთხვევაშიც კი, თუ დაფინანსებაზე პასუხი უარყოფითი იქნება, მშობლები გაჩერებას არ აპირებენ.

„დღეს, მშობლები, საბოლოო გადაწყვეტილების მოლოდინში, ძალიან დამცირებულები და გაყინულები ვართ. ასეთი გამწარებული მაშინაც კი არ ვყოფილვარ, როდესაც ჩემი შვილის დიაგნოზი გავიგე. ჩვენ წუხელ უმძიმესი ღამე გვქონდა. წვიმასა და სიცივეში ვიყავით, მაგრამ ყურადღება მაინც არავინ მოგვაქცია. ახლა პრემიერ-მინისტრის გადაწყვეტილებას ველოდებით. საბოლოო პასუხი გვითხრას - მედიკამენტს გვიფინანსებს თუ არ გვიფინანსებს. არანაირი გაწელვა!

ჯანდაცვის სამინისტროს დაპირება წელიწადი და ოთხი თვე ვითმინეთ. ამის გამო, არანაირი დაპირება! მხოლოდ და მხოლოდ გვითხრას, გვიფინანსებს თუ არა მედიკამენტს. სწირავს შვილებს სამუდამო ტკივილისა და ტანჯვისთვის თუ ჯანმრთელობის უფლებას აძლევს. ჩვენ, მშობლები არ დავიღლებით მაშინაც, თუ პასუხი უარყოფითი იქნება“, - აღნიშნეს მშობლებმა.