ჩინეთი პატივს სცემს ყოფილი საბჭოთა კავშირის ქვეყნების სუვერენული სახელმწიფო სტატუსს, - ამის შესახებ ჩინეთის საგარეო საქმეთა სამინისტროს პრესსპიკერმა, მაო ნინმა განაცხადა.

„საბჭოთა კავშირის დაშლის შემდეგ ჩინეთი იყო ერთ-ერთი პირველი ქვეყანა, რომელმაც დაამყარა დიპლომატიური კავშირები აღნიშნულ ქვეყნებთან. ამ ქვეყნებთან დიპლომატიური კავშირების დამყარების დღიდან ჩინეთი ყოველთვის იცავდა თანასწორობის პრინციპებს მეგობრული და თანამშრომლობითი ორმხრივი ურთიერთობების განვითარებაში“, - აღნიშნა ჩინეთის საგარეო საქმეთა სამინისტროს პრესსპიკერმა ბრიფინგზე.

მაო ნინის განცხადებით, მისი ნათქვამი წარმოადგენს ჩინეთის მთავრობის ოფიციალურ შეხედულებებს.

„ჩინეთი პატივს სცემს ყველა ქვეყნის სუვერენიტეტს, დამოუკიდებლობას და ტერიტორიულ მთლიანობას და მხარს უჭერს გაეროს წესდების მიზნებსა და პრინციპებს“, - აღნიშნა ჩინეთის საგარეო საქმეთა სამინისტროს პრესსპიკერმა.

შეგახსენებთ, საფრანგეთში ჩინეთის ელჩმა, ლუ შაიმ განაცხადა, რომ ყოფილი საბჭოთა კავშირის ქვეყნებს „არ აქვთ ეფექტური სტატუსი საერთაშორისო სამართალში, რადგან არ არსებობს საერთაშორისო შეთანხმება მათი, როგორც სუვერენული ქვეყნების სტატუსის განხორციელებისთვის“.