საქართველოს წითელი ჯვრის საზოგადოება 23-29 აპრილს, იმუნიზაციის კვირეულში ერთვება. ორგანიზაციის ინფორმაციით, კვირეულის გახსნაში, საქართველოს მასშტაბით, წითელი ჯვრის საზოგადოების ფილიალებიც აქტიურ მონაწილეობას იღებენ.

წითელი ჯვრის ცნობით, კვირეული იმუნიზაციის მნიშვნელობის გაზრდასა და ყველასათვის ხანგრძლივი, ჯანმრთელი ცხოვრების უზრუნველყოფას ისახავს მიზნად.

როგორც ინფორმაციაშია აღნიშნული, საქართველოს წითელი ჯვრის საზოგადოება მრავალი წელია იმუნიზაციის კვირეულშია ჩართული და ამ მიმართულებით სხვადასხვა სახის ფართომასშტაბიან საკომუნიკაციო ღონისძიებებს ახორციელებს.

კვირეულის ფარგლებში დაგეგმილი ღონისძიებები ავსტრიის განვითარების სააგენტოს (ADA), ავსტრიის წითელი ჯვრის (AuRC), წითელი ჯვრისა და წითელი ნახევარმთვარის საერთაშორისო ფედერაციის (IFRC) მხარდაჭერით, პროექტის - „ეპიდემიების მიმართ მზაობა და კოვიდ-19-ზე რეაგირება სომხეთსა და საქართველოში’’ ფარგლებში ხორციელდება.

გასულ წლებში, COVID-19-ის პანდემიის გამო მთელ რიგ ქვეყნებში ბავშვთა რუტინული ვაქცინაციის მაჩვენებლები შემცირდა. ბავშვის აუცრელობის შემთხვევაში ინფექციური დაავადებების გავრცელების რისკი იზრდება. მნიშვნელოვანია, რომ ვაქცინაციაზე ყველას თანაბარი წვდომა ჰქონდეს. საქართველოს წითელი ჯვრის საზოგადოება აქტიურად უჭერს მხარს COVID-19-ის ვაქცინაციასა და გეგმურ იმუნიზაციას, მთელი ქვეყნის მასშტაბით. ქალაქ რუსთავში მასობრივი ვაქცინაციის ცენტრი და ორი სრულად აღჭურვილი მობილური ვაქცინაციის ერთეული ფუნქციონირებს, სადაც ნებისმიერი მსურველი COVID-19 ვაქცინაციის სრულფასოვანი სერვისით ისარგებლებს.

საქართველოს წითელი ჯვრის საზოგადოება, მის პარტნიორებთან ერთად, აქტიურად მუშაობს, რათა ვაქცინების სარგებელსა და აცრების მაჩვენებლების შემცირებით გამოწვეულ რისკებზე ცნობიერება გაზარდოს.