კავკასიის საერთაშორისო უნივერსიტეტში, CIU-ს ბიზნესისა და ტექნოლოგიების ფაკულტეტის „კარიერული მენტორინგის პროექტის“ ფარგლებში, კარიერული კონსულტირების, მენტორინგისა და ქოუჩინგის სივრცის - Co.Liberum დამფუძნებელთან, მარიამ ჩოხელთან პირველი შეხვედრა გაიმართა. ამის შესახებ ინფორმაციას კავკასიის საერთაშორისო უნივერსიტეტი ავრცელებს.

მათი ცნობით, შეხვედრაზე, მისასალმებელი სიტყვით, CIU-ს ბიზნესისა და ტექნოლოგიების ფაკულტეტის დეკანი, მარიკა კლდიაშვილი წარდგა, რომელმაც პროექტის მიზნებსა და მნიშვნელობაზე ისაუბრა.

როგორც ინფორმაციაშია აღნიშნული, „კარიერული მენტორინგის პროექტი“ კავკასიის საერთაშორისო უნივერსიტეტის ინოვაციაა, რომელიც ამ დრომდე არცერთ უმაღლეს სასწავლებელში არ განხორციელებულა.

„კარიერული მენტორინგის პროექტი“მიზნად ბიზნესისა და ტექნოლოგიების ფაკულტეტის სტუდენტების პიროვნული და კარიერული განვითარების ხელშეწყობას ისახავს.

შეხვედრის ფარგლებში სპიკერმა განიხილა შემდეგი საკითხები: ვინ არის კარიერის კონსულტანტი და რაში გეხმარებათ ის?; რა შესაძლებლობები არსებობს განათლების და დასაქმების ბაზარზე?; როგორ მივხვდეთ, რა გვსურს სინამდვილეში?; მიზნების დასახვა - რა მინდა? როდის მინდა? როგორ მივაღწევ?; სამუშაოს ძიების პროცესი - სად და როგორ მოვძებნოთ ჩვენთვის სასურველი სამსახური?; როგორ შევქმნათ ეფექტური CV ინტერვიუ წინასახელშეკრულებო ეტაპი და ონბორდინგი რა მინდა მომავალში მოხდეს ჩემს კარიერაში?

ზემოხსენებული საკითხების განხილვის პარალელურად, სპიკერმა დამსწრე საზოგადოებას შესთავაზა პრაქტიკული სავარჯიშოები, სადაც როგორც ბიზნესისა და ტექნოლოგიების ფაკულტეტის სტუდენტებმა ისე, აკადემიურმა და ადმინისტრაციულმა პერსონალმა აქტიური მონაწილეობა მიიღეს.

პროექტის ფარგლებში, შემდეგი შეხვედრები 15, 22 და 29 მაისს გაიმართება“, - აღნიშნულია ინფორმაციაში.