გაერო-ში ამერიკის შეერთებული შტატებისა და ბრიტანეთის წარმომადგენლებმა რუსეთის საგარეო საქმეთა მინისტრი გააკრიტიკეს, მას შემდეგ რაც ის გაერო-ს უშიშროების საბჭოს სხდომაზე სიტყვით გამოვიდა.

„წელიწადზე მეტი გავიდა უკრაინაში რუსეთის სრულმასშტაბიანი შეჭრის შემდეგ. პრეზიდენტმა პუტინმა მთელს ქვეყანას ტანჯვა მოუტანა, გაერო-ს კონვენციის დარღვევით. ათასობით უკრაინელი მოკლული იქნა, მილიონობით იძულებით გადაადგილებული პირია, მილიარდობით ადამიანი კი მთელ მსოფლიოში პროდუქტებზე ფასების მკვეთრ ზრდას წააწყდა. რუსეთის თაობამ დაკარგა თავისი მომავალი და რუსეთის ხელისუფლებას იმის ახსნაც კი არ შეუძლია ეს რატომ მოხდა. რუსეთის პრეტენზია უკრაინის ტერიტორიაზე არასდროს არ იქნება აღიარებული. მე ვერ ვხედავ ვერაფერ ეფექტურს რუსეთის საგარეო პოლიტიკაში“,- განაცხადა დიდი ბრიტანეთის წარმომადგენელმა ბარბარა ვუდვორდმა.

აშშ-ის წარმომადგენელმა ლინდა ტომას -გრინფილდმა კი რუსეთი უპასუხისმგებლობაში დაადანაშაულა.

„რუსეთს უბრალოდ ძალის გამოყენებით საერთაშორისო საზღვრების გადახაზვა, გაერო-ს წესდების დარღვევით სურს. ის ეწინააღმდეგება ყველაფერს, რასაც ეს ინსტიტუტი იცავს. ... ხალხის პაიკებად გამოყენება სისუსტის სტრატეგიაა და არა პასუხისმგებელი ქვეყნის ქმედებები. სანამ რუსეთი პოლიტიკურ თამაშებს თამაშობს, ხალხი იტანჯება“,- განაცხადა აშშ-ის წარმომადგენელმა.