გია ცაგარეიშვილი - ხელშესახებ პროგრესზე დაყრდნობით ვფიქრობთ, სტატუსი მოგვენიჭება - არ ვართ საზარბაზნე ხორცი, გვინდა თავაწეულები მივიდეთ ევროკავშირში და არა ცალ ფეხზე მდგომი
ხელშესახებ პროგრესზე დაყრდნობით ვფიქრობთ, სტატუსი მოგვენიჭება და უსამართლო პოლიტიკური გადაწყვეტილება გამოსწორდება - არ ვართ არავის საზარბაზნე ხორცი, გვინდა თავაწეულები მივიდეთ ევროკავშირში და არა ცალ ფეხზე მდგომი,- ამის შესახებ ჟურნალისტებთან საპარლამენტო უმრავლესობის წევრმა გია ცაგარეიშვილმა განაცხადა.
მისივე განმარტებით, ხელისუფლების წარმომადგენელთა ვიზიტები სწორედ ამ მიზანს ემსახურება, რომ უპირობოდ მიიღოს ქვეყანამ სტატუსი. ცაგარეიშვილის თქმით, ყველა ფაქტი მეტყველებს იმაზე, რომ ევროკომისია ნელ- ნელა მიდის გადაწყვეტილებამდე, რომ საქართველოს მიანიჭოს კანდიდატის სტატუსი.
„ხელშესახებ პროგრესზე დაყრდნობით ვფიქრობთ, რომ სტატუსი მოგვენიჭება და ეს უსამართლო პოლიტიკური გადაწყვეტილება გამოსწორდება. საქართველოს სჭირდება ევროკავშირი და ევროკავშირს საქართველო. ეს არ არის ცალმხრივი მოძრაობა. უზარმაზარი გზა გაიარა ქვეყანამ, რომ მოგვნიჭებოდა ეს სტატუსი, ფათერაკებით აღსავსე, სისხლიანი გზა, დაუნდობელი დაპირისპირების რუსეთის ფედერაციასთან, დიქტატორ პუტინთან და ვფიქრობ, ჩვენ ეს ყველაფერი დავიმსახურეთ. დავიმსახურეთ ჩვენი ჯარისკაცების სიცოცხლის ფასად, რომლებიც ნატო- ს მისიაში მსახურობდნენ ავღანეთში და დღესაც მსახურობენ ცენტრალურ აფრიკაში ევროკავშირის მისიაში. ეს ბევრს ავიწყდება და ევროკავშირის ბევრ წევრ ქვეყანას არ გაუგზავნია თავის ჯარისკაცები ცენტრალურ აფრიკაში. 100- მდე ჩვენი სამხედრო დღესაც ემსახურება მშვიდობის დამყარების მისიას აფრიკულ სახელმწიფოში. ასე რომ, გჭირდებოდეს ქართველი მეომარი და მისი სიცოცხლე მშვიდობის დასამყარებლად და არ გჭირდებოდეს საქართველო ევროკავშირში, ეს მე არ მესმის, ამას პირდაპირ გეუბნებით, სადღაც გულისწყვეტით. ჩვენ არ ვართ არავის საზარბაზნე ხორცი, ეს უნდა გაიგოს ყველამ და გვინდა თავაწეულები მივიდეთ ევროკავშირში და არა ცალ ფეხზე მდგომი ადამიანები,"- განაცხადა ცაგარეიშვილმა.
v-if="article.gallery" v-html="article.gallery"
