აქონდროპლაზიის დიაგნოზის მქონე ბავშვების მშობლების პროტესტი გრძელდება. აქციის მონაწილეები სახელმწიფოსგან პრეპარატ "ვოსორიდიტის" ქვეყანაში შემოტანას და დაფინანსებას ითხოვენ.

აქონდროპლაზიის დიაგნოზის მქონე ერთ-ერთი ბავშვის დედის, ქეთი ბეგიაშვილის თქმით, რომელიც პრეზიდენტთან სალომე ზურაბიშვილთან შეხვედრაზე იმყოფებოდა, პრეზიდენტი არ არის ფინანსური პრობლემის გადამწყვეტი პირი, ამიტომ პროტესტი გაგრძელდება.

“პრეზიდენტი შეხვედრის დაწყებამდე გაეცნო მედიკამენტის ანოტაციას. მას ეჭვი არ ეპარება, რომ ეს მედიკამენტი საკვლევია, ან გვერდითი მოვლენები აქვს. პრეზიდენტი ემხრობა მსოფლიოს აღიარებას, რომ მედიკამენტი არის უსაფრთხო. პრეზიდენტი არ არის ფინანსური პრობლემის გადამწყვეტი პირი. პრეზიდენტი შუამავლობას ვერ გაგვიწევს პრემიერთან, შუამავლობას გაგვიწევს მთელ მსოფლიოსთან.

ჩვენდა სამწუხაროდ ამათთვის პრეზიდენტიც არ არის ავტორიტეტი, ჩვენი მოქალაქეებისთვის არის ავტორიტეტი. ჩვენ არ გავჩერდებით. ვიქნებით აქ, ვიდრე მედიკამენტს არ მივიღებთ”, - განაცხადა ბეგიაშვილმა.

აქონდროპლაზიის დიაგნოზის მქონე ბავშვების მშობლებმა და მხარდაჭერებმა მთავრობის ადმინისტრაციის შენობიდან პარლამენტამდე საპროტესტო მსვლელობა გამართეს. ისინი სკანდირებდნენ: “წამალი ბავშვებს!”.