„ქართულ-უკრაინული თანამეგობრობის ალიანსმა“ უკრაინელებისთვის, რომლებიც ომის მიზეზით, 2022 წლის 24 თებერვლის შემდეგ საქართველოში იმყოფებიან, ქართული ენის შემსწავლელი უფასო კურსი დაიწყო. ამის შესახებ ინფორმაციას „ქართულ-უკრაინული თანამეგობრობის ალიანსი ავრცელებს.

ამავე ცნობით, კურსის ხანგრძლივობა 4 თვემდე პერიოდით არის განსაზღვრული და სრულად დისტანციურია.

„კურსი თავდაპირველად ითვალისწინებდა 3 ჯგუფს და თითო ჯგუფში 12 მსმენელს, თუმცა კურსზე რეგისტრაცია გაიარა 500-ზე მეტმა მსურველმა. მაღალი მოთხოვნის გათვალისწინებით, დონორთან შეთანხმებით მოხდა თითოეულ ჯგუფში მსმენელთა რაოდენობის 20-მდე გაზრდა.

მსმენელებს უფასოდ გადაეცათ სწავლისთვის საჭირო მასალები, როგორიცაა სასწავლო სახელმძღვანელო წიგნი და მისთვის განკუთვნილი რვეულები'',- აღნიშნულია ინფორმაციაში.

„ქართულ-უკრაინული თანამეგობრობის ალიანსი“ აღნიშნულ პროექტს People in Need-ის ფინანსური მხარდაჭერით და ICWAW (International Center of War-Affected Women)-ის პარტნიორობით ანხორციელებს.