ალბათ, ერთი თვის განმავლობაში ქართული პროტოკოლი და გაიდლაინი შემუშავდება, რომელიც საშუალებას მოგვცემს ესა თუ ის რეკომენდაციები მივიღოთ - საერთაშორისო აზრი და გაიდლაინები გათვალისწინებული იქნება, - ამის შესახებ პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ, ზაზა ლომინაძემ იშვიათი დაავადებების საკითხებზე მომუშავე საკოორდინაციო საბჭოს შეხვედრის შემდეგ ჟურნალისტებთან განაცხადა.

მისივე თქმით, აქონდროპლაზიით დიაგნოზის მქონე ბავშვებთან დაკავშირებულ პროტოკოლზე მუშაობა არის რთული პროცესი.

„პროტოკოლზე მუშაობა არის რთული პროცესი, შესაჯერებელი პროცესი. მითუმეტეს, როდესაც საქმე ახალ მედიკამენტს ეხება და მოგეხსენებათ არცერთ ქვეყანას გაიდლაინში ეს მედიკამენტი შეყვანილიც კი არ აქვს, რაც ამ ჯგუფის მუშაობას ართულებს. მიუხედავად ამისა, დღეს გაფართოებულ თათბირზე, სადაც ძალიან ბევრი ექიმი, უამრავი დაწესებულების წარმომადგენელი, ჯანმრთელობის მსოფლიო ორგანიზაცია, პარლამენტი, სამინისტრო, ყველა ჩართულები ვიყავით და შევჯერდით, რომ ალბათ, ერთი თვის განმავლობაში ქართული პროტოკოლი და გაიდლაინი შემუშავდება, რომელიც საშუალებას მოგვცემს ესა თუ ის რეკომენდაციები მივიღოთ. საერთაშორისო აზრი და გაიდლაინები გათვალისწინებული იქნება”, - აღნიშნა ლომინაძემ.

ამასთან, როგორც მან აღნიშნა, ჯერჯერობით არცერთ ქვეყანას გაიდლაინში მედიკამენტი ვოსორიტიდი ამ დასახელებით და დოზირებით არ უდევს.

„ჯგუფი კვირაში ერთხელ იკრიბება და ამიტომ, მე იმედი მაქვს, რომ ამ ჩართულობით მალე ეს ყველაფერი დასრულდება“, - განაცხადა ზაზა ლომინაძემ.