ამერიკის შეერთებული შტატები კოლუმბიასა და გვატემალაში მიგრანტების ახალ ცენტრებს გახსნის, - ინფორმაციას BBC-ი ავრცელებს.

გამოცემის ცნობით, ეს ნაბიჯი უსაბუთო პირების აშშ-ის ტერიტორიაზე შესვლის შემთხვევების შემცირების მცდელობის ნაწილია.

BBC-ი წერს, რომ ახალი რეგიონული ობიექტები თვეში ათასობით განაცხადს განიხილავენ და ლეგალური მიგრაციის გზები გაფართოვდება. ასევე გაორმაგდება ან გასამმაგდება იმ პირთა დეპორტაციის შემთხვევები, რომლებსაც აშშ-ში ყოფნის უფლება არ აქვთ.

ამასთან, მიგრანტების მონაცემების დამუშავების ცენტრები საშუალებას მისცემს წარმატებულ განმცხადებლებს, ლეგალურად შევიდნენ აშშ-ში და გააუმჯობესონ ხელმისაწვდომობა ისეთ დახმარებაზე, როგორიცაა ლტოლვილთა განსახლების პროცესი და ოჯახის გაერთიანება.

BBC-ის ინფორმაციით, შეერთებულ შტატებში, ყოველთვიურად, დაახლოებით 200 000 უსაბუთო მიგრანტი ცდილობს შესვლას.