საქართველოს ტურიზმის ეროვნული ადმინისტრაციის ხელმძღვანელის მაია ომიაძის განცხადებით, იანვარი-მარტის პერიოდში შემოსავლები საერთაშორისო ტურიზმიდან რეკორდულად გაიზარდა.

როგორც მან აღნიშნა, 2023 წლის პირველ კვარტალში მოგზაურობიდან (ტურიზმიდან) მიღებული შემოსავლები, 2022 წლის ანალოგიური პერიოდთან შედარებით, 102%- ით არის გაზრდილი და 795 მლნ. აშშ დოლარს აჭარბებს.

„ტურიზმის ეროვნული ადმინისტრაცია მუდმივად ახორციელებს სტრატეგიულ ბაზრებზე მარკეტინგულ კამპანიებს, რასაც ძალიან ბევრი ტურისტი შემოჰყავს ჩვენს ქვეყანაში, ეს თავისთავად აისახება შემოსავლების ზრდაზე. პირველი კვარტლის მონაცემებით შემოსავლების რაოდენობამ რეკორდულ მაჩვენებელს მიაღწია”, - აცხადებს მაია ომიაძე.

ტურიზმის ეროვნული ადმინისტრაციის ცნობით, 2023 წლის პირველ კვარტალში ტურიზმიდან მიღებულმა შემოსავლებმა 2019 წლის დონეს 37.5 %-ით გადააჭარბა.

„ტურიზმიდან მიღებული შემოსავლები 2023 წლის პირველ კვარტალში 64.7%-ით გაიზარდა ევროკავშირიდან, 136.1%-ით გაიზარდა თურქეთიდან, 73.2% ზრდა დაფიქსირდა ისრაელიდან და ა.შ. 2023 წლის 1 კვარტალში, მოგზაურობიდან მიღებული შემოსავლების მაღალი მაჩვენებლებით აღსანიშნია რამდენიმე ქვეყანა, მათ შორის ევროკავშირი, თურქეთი, ისრაელი, სომხეთი და სხვა, ამავე პერიოდში, 2019 წელთან შედარებით, ტურიზმიდან შემოსავლების აღდგენის დონით ასევე გამოირჩევა ევროკავშირი, ისრაელი, საუდის არაბეთი და სხვა სახელმწიფოები“, - აღნიშნულია გავრცელებულ ინფორმაციაში.