მე ვიცი, რომ თქვენ მშვიდობა და უკეთესი დემოკრატია გსურთ, აქედან გამომდინარე, პროტესტმა შედეგი გამოიღო, - ამის შესახებ საფრანგეთის საგარეო საქმეთა მინისტრმა კატრინ კოლონამ ჟურნალისტებს, საქართველოში ვიზიტისას განუცხადა.
როგორც კოლონა აღნიშნავს, ევროინტეგრაციის გზაზე მთავარია კანონის უზენაესობის დაცვა, ადამიანის უფლებების პატივისცემა და ასევე მედია თავისუფლება, რასაც საქართველო უნდა გაჰყვეს.
„ჩემი ქვეყანა და ევროკავშირი შეშფოთებულია იმით, რაც პარლამენტში კანონის განხილვის დროს ხდებოდა. ჩვენ ვნახეთ პროტესტი, ასევე ღიად დავუჭირეთ ამ მოვლენებს მხარი, მე ვიცი, რომ თქვენ მშვიდობა და უკეთესი დემოკრატია გსურთ, აქედან გამომდინარე, პროტესტმა შედეგი გამოიღო. უფრო მეტიც, პრეზიდენტმა მაკრონმა ქართველ ხალხს მხარდაჭერა გამოუცხადა. ეს იყო სპონტანური გამოსვლა, განსაკუთრებით ახალგაზრდების. ევროინტეგრაციის გზაზე მთავარია დემოკრატია, კანონის უზენაესობა, ადამიანის უფლებების პატივისცემა და დაცვა, ასევე მედია თავისუფლება, ეს ყველაფერი შავით თეთრზე წერია, რომელსაც საქართველო უნდა გაჰყვეს“, - განაცხადა კატრინ კოლონამ.
კითხვაზე, თუ როგორ ხედავს ის ამ პროცესს პოლიტიკური პატიმრების - ნიკა გვარამიასა და მიხეილ სააკაშვილის ფონზე, საფრანგეთის საგარეო საქმეთა მინისტრი ასე პასუხობს:
„მე აუცილებლად ვისაუბრებ ყველა ამ საკითხზე მთავრობის წარმომადგენლებთან, თუმცა, საჯაროდ, ამაზე კომენტარს ვერ გავაკეთებ“, - განაცხადა კოლონამ, რომლის თარგმანსაც „მთავარი“ ავრცელებს.
