აქონდროპლაზიის დიაგნოზის მქონე ბავშვების მშობლები კვლავ პრემიერ-მინისტრ ირაკლი ღარიბაშვილთან შეხვედრას და სამართლებრივი აქტის გაფორმებას ითხოვენ.

როგორც ერთ-ერთი ბავშვის დედამ, სალომე გაბელაშვილმა „ინტერპრესნიუსს“ განუცხადა, ისინი ითხოვენ, 1-ელ სექტემბრამდე მედიკამენტი „ვოზორიტიდი“ ქვეყანაში შემოიტანონ.

„ჩვენი მოთხოვნა ერთადერთია, რომ ირაკლი ღარიბაშვილმა, პირადად, მშობლებთან ერთად გაიაროს ეს საკითხები, თუ რას ვითხოვთ და რამდენად სამართლიანად ვითხოვთ. ასევე, შეიქმნას სამართლებრივი აქტი, კონკრეტული თარიღი ითქვას, თუ როდის დაიწყებენ ჩვენი შვილები მედიკამენტით მკურნალობას. დამიჯერეთ, არც ერთ დედას არ გვსიამოვნებს ქუჩაში 24 საათი ყოფნა. ერთადერთი მოთხოვნა გვაქვს, გაგვცეს პასუხი, თუ როდის დაიწყება ჩვენი შვილების მკურნალობა. რას ვაპირებთ? აღარ ვიცით მშობლებმა რა დავაპიროთ, რადგან მოგეხსენებათ, 16 თვე ველოდებოდით ამ ყველაფერს მშვიდად. ერთადერთი მიზეზი ფინანსები იყო, თუ ფინანსები არ არის პრობლემა, პრემიერს მივმართავ, სამართლებრივი აქტი შეიქმნას და ამ ბავშვების მკურნალობა დაიწყონ. 1-ელ სექტემბრამდე დაიწყონ ჩვენი შვილების მკურნალობა, მაისის ბოლოს სრულდება კონკრეტულად აქონდროპლაზიის დიაგნოზის ბავშვების გაიდლაინის შექმნა. პირველ სექტემბერს ჩვენმა შვილებმა მკურნალობა დაიწყონ. პრემიერის სახელზე წერილიც ჩავაბარეთ. კონტაქტზე არავინ გამოდის, გულნატკენები ვართ, დედები გულნატკენები არ უნდა ვიყოთ, ჩვენ შვილებს არ უნდა ვუყურებდეთ, თუ როგორ უარესდება მათი მდგომარეობა და ჯანმრთელობა“, - განაცხადა გაბელაშვილმა.