ლაზარე გრიგორიადისი რაც შეიძლება სწრაფად არის გასათავისუფლებელი - უნდა გაითვალისწინონ პოლიტიკური კონტექსტი. ეს ადამიანი ამ ქვეყნის ევროატლანტიკური მომავლისთვის იბრძოდა, - ამის შესახებ „გირჩი - მეტი თავისუფლების“ ლიდერმა, ზურაბ ჯაფარიძემ თბილისის საქალაქო სასამართლოსთან განაცხადა, სადაც მარტის აქციების დროს დაკავებული ლაზარე გრიგორიადისის მხარდამჭერი აქცია მიმდინარეობს.

მისივე თქმით, გრიგორიადისის თავისუფლება პრინციპული საკითხია.

„ლაზარე არის გასათავისუფლებელი და რაც შეიძლება სწრაფად. ნებისმიერ პროტესტში, რომელიც ლაზარეს გათავისუფლებისკენ იქნება მიმართული, მონაწილეობას მივიღებ. ჩემი აზრით, ეს არის პრინციპული საკითხი, რომ ეს ადამიანი გამოვიდეს გარეთ, რაც შეიძლება სწრაფად.

შემიძლია გაგახსენოთ 3 წლის წინ რა ხდებოდა პანკისში. პოლიციელებიც დააზიანეს, პოლიციელების ტექნიკაც, მანქანებიც დაწვეს და არც ერთი ადამიანი არ დასჯილა, იმიტომ, რომ რეალობა იყო ასეთი, რომ პოლიტიკური კონტექსტი გაითვალისწინეს. აქაც იგივე უნდა მოხდეს. უნდა გაითვალისწინონ პოლიტიკური კონტექსტი. ეს ადამიანი ამ ქვეყნის ევროატლანტიკური მომავლისთვის იბრძოდა. ძალიან მარტივია,“ - განაცხადა ჯაფარიძემ.