საფრანგეთის ქალაქებში საპირველმაისო დემონსტრაციების წინააღმდეგ სამართალდამცველებმა ცრემლსადენი გაზი გამოიყენეს.

პარიზის გარდა, არეულობა იყო ლიონში, ნანტში, მარსელში, ტულუზასა და რენში.

მედიის ცნობით, საღამოს 5 საათისთვის დემონსტრაციების დროს 180 პირი დააკავეს, მათგან 53 პარიზში.

როგორც მედია წერს, დემონსტრანტებთან შეტაკება მას შემდეგ მოხდა, რაც პროფკავშირებმა მშრომელთა საერთაშორისო დღის ტრადიციული მსვლელობები ანტისამთავრობო პროტესტად, საპენსიო ასაკის ზრდის გამო, გადააქციეს.

მედიის ცნობითვე, პარიზში დემონსტრაცია, რომელსაც პროფკავშირები უძღვებოდნენ, მშვიდობიანად დაიწყო. დემონსტრანტები სოციალურ სამართლიანობას მოითხოვდნენ. გარდა ამისა, ისინი პრეზიდენტ ემანუელ მაკრონის გადადგომას ან მის მიერ ინიცირებული კანონის გაწვევას მოითხოვდნენ, რის მიხედვითაც ქვეყანაში საპენსიო ასაკი 62-დან 64 წლამდე გაიზარდა.

აქციის მონაწილეებმა პარიზში, ზოგიერთი ავტობუსის გაჩერება და მაღაზიების ფასადი დააზიანეს. ამასთან, პოლიციის მისამართით სხვადასხვა საგნებს, მათ შორის „მოლოტოვის კოქტეილებს“ ისროდნენ.