აქონდროპლაზიის დიაგნოზის მქონე ბავშვების მშობლების განცხადებით, ჯანდაცვის სამინისტროსთან თანამშრომლობას აგრძელებენ, მაგრამ მთავრობის ადმინისტრაციის წინ პროტესტს არ წყვეტენ.

როგორც აქონდროპლაზიის დაავადების მქონე ერთ-ერთმა მშობელმა, სალომე გაბელაშვილმა განაცხადა, აქციის მონაწილეებს ჯანდაცვის სამინისტროს მხრიდან დამადასტურებელი დოკუმენტი სჭირდებათ, რომ მათი შვილები სექტემბრიდან მედიკამენტ „ვოსორიტიდით“ მკურნალობას დაიწყებენ.

„მშობლების მხრიდან თანამშრომლობა ჯანდაცვის სამინისტროსთან გაგრძელდება, მაგრამ მშობლებს იმის დამადასტურებელი სიტყვები და დოკუმენტი გვჭირდება, რომ ჩვენი შვილები მედიკამენტს ნამდვილად მიიღებენ. როგორც 16 თვე დავკარგეთ, ისე ეს დღეები და შეხვედრები დაკარგული არ უნდა იყოს. ჯანდაცვის მინისტრის მოადგილე, თამარ გაბუნია შეხვედრაზე ძალიან კარგად გვესაუბრებოდა და ამბობდა, რომ მედიკამენტი საჭიროა, ამ ბავშვებისთვის არის შანსი და ეს ჩვენ უნდა გამოვიყენოთ. მე მას, როგორც მშობელმა ვთხოვე, რომ როგორც საბჭოზე საუბრობს, ისე მედიის წინაც მსგავსი კომენტარი გააკეთოს და საზოგადოებას მოახსენოს, რომ მედიკამენტზე მუშაობენ და არაუგვიანეს სექტემბრის თვეში ჩვენი შვილების მკურნალობა დაიწყება. ერთადერთ რამეს ვითხოვთ მშობლები, რომ ჩვენმა შვილებმა სექტემბერში მედიკამენტის მიღება დაიწყონ“, - განაცხადა სალომე გაბელაშვილმა.

აქციის ერთ-ერთი მონაწილის, ქეთევან ბეგიაშვილის თქმით, ჯანდაცვის მინისტრის მოადგილემ, თამარ გაბუნიამ მშობლებთან შეხვედრის დროს საბოლოდ აღიარა, რომ აღნიშნული მედიკამენტი ბავშვებისთვის არის ერთადერთი შანსი.

„გუშინდელ შეხვედრასთან დაკავშირებით მინდა გითხრათ, რომ ჩემთვის პირადად ახალი და გასახარი არაფერი მომხდარა. ზუსტად, ოთხი თვის მანძილზე ერთი და იგივე ტერმინი მესმის, რომ "მუშაობენ". მინდა მთელმა საქართველომ გაიგოს, რომ შეხვედრაზე საუბარი მედიკამენტის ვარგისიანობაზე აღარ იყო. თამარ გაბუნიამ აღიარა, რომ ეს მედიკამენტი ბავშვებისთვის არის ერთადერთი შანსი და ეს შანსი გამოყენებული უნდა იყოს, მაგრამ ჩვენი პროტესტის მიზეზი ის არის, რომ გვითხრან გონივრული ვადა, თუ როდის შემოვა ქვეყანაში ჩვენი შვილებისთვის საჭირო მედიკამენტი. ამაზე არანაირ აქცენტს არ აკეთებენ. შიდა საუბრები უფრო მეტად პოზიტიურია, გარედან უფრო კეთდება აქცენტი რეაბილიტაციაზე. გასაგებია, ეს ყველაფერი მნიშვნელოვანია, მაგრამ ჩვენ გვსურს მედიკამენტი დროულად შემოიტანონ. სახალხო დამცველი გვეუბნება, რომ ჩვენს გვერდით დგას და გვეხმარება. ვნახოთ, შედეგებს ყველა ერთად ვნახავთ“, - განაცხადა ქეთევან ბეგიაშვილმა.

როგორც მან აღნიშნა, მანიფესტანტებს მთავრობის ადმინისტრაციის წინ კვლავ კარვის გაშლის უფლებას არ აძლევენ.

„ამასთან, არ გვაძლევენ იმის საშუალებას, რომ მთავრობის ადმინისტრაციის წინ კარავი გავშალოთ და წვიმაში დედები არ დავლპეთ. ვთხოვ შესაბამის ორგანოებს დაგვეხმარონ, რომ დღევანდელი და შემდეგი ღამე წვიმაში და ქარში არ გავატაროთ“, - განაცხადა ქეთევან ბეგიაშვილმა.