დაუყოვნებლივ გათავისუფლდეს ნიკა გვარამია! - ამ მოწოდებით, პრეზიდენტის ადმინისტრაციასთან ჟურნალისტები, არასამთავრობო ორგანიზაციების წარმომადგენლები და „ნიკა გვარამიას თავისუფლების მოძრაობის“ წევრები აქციას მართავენ.

აქციაზე მყოფები პრეზიდენტს მიმართავენ, რომ შეწყალების უფლების გამოყენებით ნიკა გვარამია პატიმრობიდან გაათავისუფლოს. აქციაზე იმყოფება და მოთხოვნას უერთდება გერმანიის ბუნდესტაგის დეპუტატი, თომას ჰაკერი.

„ნიკა გვარამიას გათავისუფლების მოძრაობის“ ერთ-ერთი წევრის, პოლიტიკოს, გედევან ფოფხაძის თქმით, გვარამიას გათავისუფლების ბერკეტი ახლა სალომე ზურაბიშვილის ხელშია.

„თუ სალომე ზურაბიშვილს ნიკა გვარამია, როგორც უკანონო პატიმარი არ მიაჩნია თავის ყურადღების ღირსად, მაშინ ევროპულ რიტორიკასაც თავი უნდა დაანებოს, იმიტომ, რომ ნიკას საპყრობილის გასაღები მის ჯიბეშია. ის ნიკას არ ათავისუფლებს და გაუგებარია, რით აპირებს 31 მაისს ევროპარლამენტარებთან სალაპარაკოდ წავიდეს“, - განაცხადა ფოფხაძემ.

ნიკა გვარამიას გათავისუფლების აუცილებლობაზე ისაუბრა „ნიკა გვარამიას თავისუფლების მოძრაობის“ კიდევ ერთმა წევრმა და ასევე პოლიტიკოსმა სერგი კაპანაძემ. მისი თქმით, ფაქტია, რომ ნიკა გვარამიას თემა ერთ-ერთი სერიოზული თემაა, რომელიც უნდა გადაიჭრას იმისთვის, რომ საქართველოს ევროინტეგრაცია დაჩქარდეს.

მისი თქმით, ამის გარეშე საქართველოს პროგრესი არ ექნება, რასაც პარტნიორებიც ხედავენ.