„ერთიანი ნაციონალური მოძრაობის“ ქობულეთის საკრებულოს წევრის, ლაშა კომახიძის განცხადებით, 1 წლის ვადაში სოფელ კვირიკესა და გვარაში ბაგა-ბაღები უნდა აშენებულიყო, მაგრამ მოსახლეობა კვლავ საბავშვო ბაღებით ვერ სარგებლობს და მშობლებს აღსაზრდელების ქალაქში ან მეზობელ სოფლებში ტარება უწევთ.

მისივე თქმით, სატენდერო პირობებით გათვალისწინებული ვადები ამოწურულია, თანხის ნაწილი კი ბიუჯეტიდან უკვე დახარჯული.

„2021 წლის 24 სექტემბერს ელექტრონული ტენდერის აუქციონის გარეშე, ქობულეთის მუნიციპალიტეტსა და შპს "ბილდ მენეჯმენტს" შორის ორი ხელშეკრულება დაიდო, რის საფუძველზეც სოფელ კვირიკესა და გვარაში 1 წლის ვადაში ბაგა-ბაღები უნდა აშენებულიყო.

ტენდერების საერთო ღირებულება 2 მლნ. 930 ათას ლარზე მეტს წარმოადგენს.

მიუხედავად იმისა, რომ სატენდერო პირობებით გათვალისწინებული ვადები უკვე ამოწურულია, თანხის ნაწილი კი ბიუჯეტიდან გახარჯული, სოფელ კვირიკესა და სოფელ გვარას მოსახლეობა კვლავ საბავშვო ბაღებით ვერ სარგებლობს და მშობლებს აღსაზრდელების ქალაქში ან მეზობელ სოფლებში ტარება უწევთ.

აღნიშნული ფაქტი ადასტურებს მმართველი პარტიის საქმისადმი გულგრილ დამოკიდებულებასა და კორუფციის ნიშნებს,“ - განაცხადა ლაშა კომახიძემ.