შვედეთმა ირანისა და შვედეთის ორმაგი მოქალაქის, ჰაბიბ ჩააბის სიკვდილით დასჯის გამო პროტესტის გამოხატვის ნიშნად ირანის ელჩის მოვალეობის შემსრულებელი საგარეო საქმეთა სამინისტროში დაიბარა.

„სიკვდილით დასჯა არის არაადამიანური და შეუქცევადი სასჯელი და შვედეთი, ევროკავშირის დანარჩენ ქვეყნებთან ერთად, გმობს მის გამოყენებას ნებისმიერ პირობებში“, - ნათქვამია შვედეთის საგარეო საქმეთა სამინისტროს განცხადებაში.

6 მაისს ცნობილი გახდა, რომ ირანში ტერორიზმის ბრალდებით ირანისა და შვედეთის ორმაგი მოქალაქე სიკვდილით დასაჯეს. მას ბრალი 2018 წლის სამხედრო აღლუმის დროს მომხდარ აფეთქებაში მონაწილეობისთვის წაუყენეს. ჰაბიბ ჩააბი ირანის უსაფრთხოების ძალებმა თურქეთში დააკავეს და შემდეგ თეირანში გადაიყვანეს.